Lüdmila Alekseyeva: «Er bir nesilniñ öz maqsadı bar ve er bir nesil bunıñ içün küreşmeli»

19 Mayıs 2012

“Qırımtatarlar dünyağa bildirecek şeylerini öz informatsiyalarında beyan etip, SSSRde ilk defa çıqarılğan ve uquqqoruyıcılarnıñ “Hronika tekuşçih sobıtiy” degen cıyıntığı şekilinde bütün dünyada tarqatıldı , – dedi Meclis reisiniñ birinci muavini Refat Çubarov, Bütünqırım matem mitinginde 1968—1972 senelerde şu bülletenniñ birinci maşinistkası olğan belli uquqqoruyıcı Lüdmila Alekseyevanı taqdim eter ve söz nevbetini berir eken.

O, şunı da qayd etti ki L.Alekseyeva 1976 senesi Moskva Helsinki gruppasınıñ esasçılarından biri olıp, daima qırımtatar halqına yardım etti. Asılında Lüdmila Alekseyeva da qırımlıdır, çünki Kezlevde dünyağa keldi.

“Menim azizlerim, – dep başladı öz çıqışını Lüdmila Alekseyeva. Siz – baba-dedeleriñizniñ eñ teren arzusını kerçekleştirgen nesilsiñiz. Siz Qırımda yaşaysıñız, siziñ balalarıñız ve torunlarıñız da tuvğan topraqlarında yaşaycaqlar. Siziñ ögüñizde de ulu maqsad tura – qırımtatarlar olaraq yaşamaq içün bunı qanun ile tasdiqlanmasına irişmek kereksiñiz”.

Bunıñ kibi de o, Qırımğa qaytmaq içün küreşken ve iç bir şeyge baqmadan buña irişken baba-dedeleriñizden ibret alıñız, dedi.

Mustafa Cemilev ve onıñ meslekdeşleri de er kes içün nümüne olğanını Lüdmila Alekseyeva ayrıca qayd etti. “Er bir nesilniñ öz maqsadı bar ve er bir nesil onıñ içün küreşmeli” – dedi L.Alekseyeva, Bütünqırım matem mitinginiñ iştirakçilerine muracaat eter eken .

Malümat içün:   2012 senesi mayıs 18-de Qırımda Qırımtatar halqı öz tarihiy Vatanı Qırımdan sürgün etilgeniniñ 68 yıllığına bağışlanğan Bütünqırım matem mitingi olıp, onda 30 biñden ziyade insan iştirak etti