«Lenur İslâmov ve Zaur Smirnov siyasetçi degiller, icra akmiyetinde olar siyasetnen meşğul olmaycaqlar, – dedi R. Çubarov – Siyasiy qarar almaq ve qıymet kesmek Qırımtatar halqınıñ Meclisi ve Qurultayınıñ işidir»

Qırımtatar halqı Meclisiniñ Aprel 1 künü olıp keçken kenişletilgen toplaşuvında Qurultay delegatları, regional meclis reisleri, qırımtatar cemaat teşkilâtlarınıñ vekilleri iştirak ettiler.

Toplaşuv devamında mart 29 künü ötkerilgen Qırımtatar halqı Qurultayında Mecliske berilgen cumhuriyet icra akimiyet organlarına işke namzetlerni tevsiye etmek avalesine mart 30 künü Meclis alğan qarar leyhası muzakere olundı.

Seslendirilgen fikir ve teklifler közge alınıp qabul etilgen “Qırımnıñ kerçek şaraitte qırımtatar halqınıñ yerleşmesinen bağlı ameliy meselelerniñ çezimi aqqında” qararnı Meclis reisi R. Çubarov imzaladı.

Bu qararğa binaen Meclis qırımtatar halqınıñ yerleşmesinen bağlı ameliy meselelerni çezmek maqsadında Qırım Nazirler Şurasınıñ erkânında çalışmağa Qırım baş naziriniñ muavini vazifesinde Lenur İslâmovğa ve Cumhuriyet milletlerara munasebetler ve sürgün etilgen vatandaşlarnıñ işleri boyunca komitet reisligine Zaur Smirnovğa razılıq berdi.

R.Çubarov qayd etkenine köre, mezkür qarar Qırımda tamır halq olğan qırımtatar halqınıñ istegi ve razılığısız amelge keçirileyatqan siyasiy, iqtisadiy ve uquqiy deñişmelerni tanımay. Bundan da ğayrı Meclis reisi şuña da emiyet berdi ki, Meclis şimdilik ancaq 2 namzet kösterdi ve bu, akimiyetniñ qırımtatarlarnıñ meselesini çezmek oğrunda areket ve niyetlerini körmek içün yeterlidir.

“Lenur İslâmov ve Zaur Smirnov siyasetçi degiller, icra akmiyetinde olar siyasetnen meşğul olmaycaqlar, – dedi R. Çubarov – Siyasiy qarar almaq ve qıymet kesmek Qırımtatar halqınıñ Meclisi ve Qurultayınıñ işidir”
 

---

Qırımtatar halqı Meclisiniñ qararı

“Qırımnıñ kerçek şaraitte qırımtatar halqınıñ yerleşmesinen bağlı ameliy meselelerniñ çezimi aqqında”

Qırım sakinleriniñ kündelik ömürini belgilemek içün tadbiq etiletâqan siyasiy, uquqiy, iqtisadiy ve diger deñişmeler Qırımnıñ tamır halqı qırımtatar halqınıñ buña razılığı ve istegisiz yapılmaqta.

Qırımda olıp keçken vaqialar içün mesülietni boynuna alğan akimleriniñ qırımtatar halqına nisbeten qapa-qarşı niyetlerni bildirgeni olar tarafından qırımtatar halqınıñ aqları ve menfaatları qorçalanacağına şübe doğura.

Qırımtatar halqınıñ Meclisine Qurultaynıñ mart 29 künü alğan “Qırımtatar halqınıñ öz tarihiy toprağı Qırımda öz-özüni belgilev aqqını qullanmaq aqqında” Qararnıñ amelge keçirilmesi boyunca tedbirler planını işlemek avale etilsin.

Aynı zamanda bugünki şaraitte qırımtatar halqınıñ meselelerini çezüvnen bağlı çoqtan-çoq problemler operativ şekilde seslenüvni ve olarnıñ çeziminde Meclisten vekâletlik alğan qırımtatar halqı vekilleriniñ bivasta iştirakini talap ete.

Qırımtatar halqınıñ Meclisi qarar bere:

1. Qırımtatar halqını yerleştirüvnen bağlı ameliy meselelerni çezmek maqsadında Qırım Nazirler Şurasınıñ erkânına

LENUR İSLÂMOVnıñ – Qırım Nazirler Şurası reisiniñ muavini vazifesinde;

ZAUR SMİRNOVnıñ – Milletler ve sürgün etilgen vatandaşlarnıñ işleri boyunca cumhuriyet komitetiniñ reisi vazifesinde kirmesini mümkün dep saymaq.

2. Lenur İslâmov ve Zaur Smirnovğa qırımtatar halqınıñ yerleşmesinen bağlı meseleler çezilmesiniñ ketişatı aqqında er afta Qırımtatar halqı Meclisiniñ toplaşuvında esabat bermek avale etilsin.

3.Qırım Nazirler Şurasınıñ erkânına tevsiye etilgen Lenur İslâmov ve Zaur Smirnovnıñ eki aftalıq faaliyetleri neticelerine köre qırımtatar halqı vekilleriniñ Qırım Nazirler şurasında çalışmalarınıñ devam etmesiniñ maqsadğa uyğun ya da uyğun olmağanı Meclis toplaşuvında tekrar baqılsın.

4. Zaur Smirnovnıñ aprel 1-den itibaren Meclis azalığını toqtatıp turmaq ve soñra Qurultaynıñ nevbetteki sessiyasında istifa etmek aqqındaki arizası

5. Meclisniñ mezkür qararı Qırımnıñ tamır halqı olğan qırımtatar halqınıñ razılığı ve istegi olmadan Qırımda tadbiq etileyatqan siyasiy, iqtisadiy, uquqiy deñişmelerniñ tanılması degil.

Refat Çubarov
Qırımtatar halqı Meclisiniñ reisi

2014 senesi aprel 01.
Aqmescit ş.