Lenin regional meclisiniñ reisi öz vazifesinden boşadı

13 Noyabr 2013

2013 senesi noyabr 12 künü Meclis reisiniñ muavini, Meclisniñ milliy idare, QMC devlet ve icra akimiyeti organları, bütün seviyedeki şuralarnıñ deputatlarınen çalışuv boyunca idareniñ başı  Zaur Smirnov  ve Qurultay Merkeziy saylav komissiyasınıñ başı Zair Smedlâyev iş ziyaretinen Lenin rayonında bulundılar.

Qurultay Merkeziy saylav komissiyasınıñ başı Zair Smedlâyevniñ haber etkenine köre Lenin regional meclis toplaşuvı ötkerilip, onda  regional meclis azaları ve bu regiondan Qırımtatar halqı VI çağırılış Qurultayına saylanğan delegatlar iştirak ettiler.  Toplaşuvda  Qırımtatar halqı VI çağırılış Qurultayınıñ 1-nci sessiyası aqqında malümat berildi.  Toplaşuv devamında  bunıñ kibi de regional meclis reisiniñ vazifesinden boşaması aqqında mesele de baqıldı. 

“Lenin regional meclisiniñ reisi  öz vazifesinden boşağanı aqqında arizasını oqudı, – dedi Zaur Smirnov. – Onıñ yerine Lenur Ablâzimov saylandı O, bu vazifeni vaqtınca eda etecek. Yañı reis regional konferentsiya keçirilgen soñ seçilecek”. Z. Smirnovnıñ bildirgenine köre  regional konferentsiyanı keçirüv  vaqtı  Milliy  Meclis  toplaşuvında tasdiqalanacaq. 

Qurultay Merkeziy saylav komissiyasınıñ başı Zair Smedlâyevniñ haber etkenine köre, Elvira Akimova öz arizasında  vazifesinden aileviy şarait ve sağlığı sebebinden boşağanını yazğan.  Bundan ğayrı, Z. Smedlâyev şunı da qoştı ki, regional meclis reisiniñ muavinleri vazifeni vaqtınca eda etip saylanmaqnı red ettiler.