Lemmar Yunusov Aqmescit regional meclisiniñ reisi oldı

13 Mayıs 2012

2012 senesi mayıs 12-de Aqmescit regional meclisniñ konferentsiyası olıp keçti. “Qırımtatar halqı öz-özüni idare etüv yerli milliy organları aqqında Nizam”ğa köre konferentsiyanıñ işini Yerli meclislerge saylavlarğa azırlanuv ve keçirüv boyunca komissiyanıñ reisi, Meclis reisiniñ birinci muavini Refat Çubarov ve komissiya kâtibi, Meclis kâtibiyetiniñ başı Zair Smedlâyev alıp bardılar.

Konferentsiyanıñ işinde 34 yerli meclisni temsil etken 277 delegat iştirak etti.

Konferentsiyanıñ kün tertibine Aqmescit regional meclis reisi ve regional meclis erkânını şekillendirüv meseleleri qoyuldı.

Konferentsiya delegatları regional meclis reisini saylav tertibini belgilediler.

Reylerniñ çoqluğınen regional meclis reisini tek yerli meclis azaları arasından saylamaq qararı alınıp, reislikke Ruslan Ennanov ve Lemmar Yunusovnıñ namzetleri kösterildi.

Gizli rey berüv neticeleri boyunca Aqmescit regional meclisiniñ reisi olaraq Lemmar Yunusov seçildi.

Lemmar Yunusovnıñ teklifi boyunca Aqmescit regionla meclis erkânına Aqmescit şeer şurasınıñ deputatı Anafi Cemilev de kirsetildi.

Konferentsiya işiniñ soñunda yañı saylanğan reisni şahsen Qırımtatar halqı Meclisiniñ reisi Mustafa Cemilev hayırlap, qırımtatar halqı meselelerini çezüv oğrundaki faaliyetinde muvafaqiyetler tiledi.