Kütleviy sürgünlik ve qatller qurbanlarınıñ hatırasını saqlav oğrunda Umumavropa stalinizm ve natsizm qurbanlarınıñ hatırası kününe bağışlanğan Bütünqırım mitingi iştirakçileriniñ qararı

23 Avgust 2012

Biz, Kütleviy sürgünlik ve qatller qurbanlarınıñ hatırasını saqlav oğrunda Umumavropa stalinizm ve natsizm qurbanlarınıñ hatırası kününe bağışlanğan Bütünqırım mitinginiñ iştirakçileri OSCE Parlament Assambleyası 2009 senesi iyül 3-te Vilnüste qabul etken “XXI asırda OSCE regionında insan aqları ve serbestligini taqdirlev” qararına tolusınen qoltutaraq:

– ukrain ve qırımtatar halqları daa yaqın keçmişte soyqırımğa oğrağanları, kommunist ve natsist rejimleri tarafından insan aqları bozulğanı ve insanlıqqa qarşı cinayet qurbanları olğanını qayd eterek;

– Ukrainada kommunist rejimni ve onıñ tarafından qırımtatar ve ukrain halqlarına nisbeten yapqan cinayetliklerini açıqtan-açıq aqlağan siyasiy küçlerniñ faalleşkeni neticesinde insan ve halqlarnıñ aqları kene telüke altında bulunğanını qayd eterek;

– devlette akimiyet ve muhalifet küçleri arasında muntazam siyasiy dialognıñ yoqluğı yetkeli rejimniñ tiklenmesine alıp kelecegine qasevet sezerek;

– SSSR kommunist rejimi tarafından öz Vatanından sürgün etilgen, onlarnen yıllar devamında sürgünlik yerlerinde zorluqnen tutulğan qırımtatar halqınıñ qaytuv, yerleşüv ve aqlarınıñ ğayrıdan tiklenmesi meseleleriniñ kompleks şekilde çezilmek lâzimligini devlet açıqtan-açıq itibarğa almağanını qayd eterek
Ukraina Prezidenti, Ukraina Yuqarı Şurası ve Nazirler Şurasından insan ve halqlarnıñ aqlarını teminlev saasında halqara qanunlarğa riayet etilmesini talap etemiz.

Bu munasebetnen OSCE , Avropa Şurası ve Avropa Birligine ukrain cemiyetini demokratlaştırğan ve öz Vatanına qaytayatqan qırımtatar halqınıñ aqlarını ğayrıdan tiklemesini teminlegen konkret qarar ve areketlerni qabul etmelerine çağıramız.

Bugün biz Avropanıñ bütün halqlarınen beraber stalinizm ve natsizm qurbanlarınıñ hatırası ögünde secde etemiz.

Kütleviy sürgünlik ve qatller qurbanlarınıñ hatırasını saqlav oğrunda Umumavropa stalinizm ve natsizm qurbanlarınıñ hatırası kününe bağışlanğan Bütünqırım mitinginde qabul etildi

Aqmescit ş.
2012 senesi avgust 23