Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve milletçilik qurbanlarınıñ hatırasına bağışlanğan Bütünqırım miting iştirakçileriniñ qararı

23 Avgust 2011

72 sene evelsi 1939 senesi avgust 23 künü kommunistik SSSR ve faşist Almaniyası tarafından Moskvada “Ribbentrop – Molotov” añlaşması imzalanmasınen eki totalitar devlet ve HH asırnıñ insanlıqqa qarşı, Avropa halqlarına genotsid, aq-uquqları bozuluvını, serbestlik sıñırlanmasını, arbiy cinayetlikler ketirgen mevkurelerniñ işbirligi açıqtan-açıq tasdiqlanğan edi.

Yüzlernen million insan qurbanları, tamamile yoq etilüvge üküm etilgen onlarnen halqlar – bular faşist Almaniyası ve kommunistik SSSR cinaiy faaliyetiniñ neticesidir. Bu eki devlet bütün insanlıq medeniyetine telüke doğurdılar.

Madam ki faşist Almaniyası ve kommunistik SSSR amelge keçirgen zulum, cinayetliklerniñ aqibetleri tolusınen yoq etilmegen, tamamile yoq etilmek maqsadınen sürgünlikke oğratılğan halqlarnıñ aq-uquqları daa ğayrıdan tiklenilmegen eken bir sıra devletlerde, ve şu cümleden Ukrainada cemiyetni şu felâketke bir daa oğratuv telükesi mevcuttır.

Böyle telüke sırasına biz:

-insan aq-uquqları ve serbestligini teminlegen aqiqiy demokratik sistemanıñ yoqluğı,

– Ukrainadaki bir sıra siyasiy partiyalar ve ukrain siyasetçileriniñ bayağı qısmı kommunist mevkuresini maqtavı ve SSSR kommunistik rejimi yapqan cinayetlerni aqlamağa tırışuvı

– SSSR kommunist rejiminiñ cinayetlerini qaralağan, şu cinayetlerni yapuvda bivasta iştirak etken şahıslarnı cevapkârlıqqa çekken, sınfiy, milliy ve diniy üstünlik mevkuresini ögge sürgen siyasiy küçlerniñ faaliyetini yasaqlağan qararlar qabul etilmesine lâqayd baqılğanı,

– öz Vatınından sürgün etilgen ve onlarnen yıllar devamında sürgünlik yerlerinde zorluq ile tutulğan qırımtatar halqınıñ aq-uquqlarını ğayrıdan tiklev, yerleştirüv ceryanına mania oluv allarını kirsetemiz.

Biz, Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve milletçilik qurbanlarınıñ hatırasına bağışlanıp Aqmescitte 2011 senesi avgust 23-te keçirilgen Bütünqırım mitinginiñ iştirakçileri 2009 senesi iyül 3-te Vilnüs şeerinde ÖBSE Avropada Telükesizlik ve Emekdaşlıq boyunca Parlament Assambleyasınıñ “Bölüngen Avropanı birleştirüv: HH1 asırda ÖBSE regionında insan uquqları ve serbestligini taqdirlev” qararını tolusınen maqulleyerek, kelecekte totalitar rejimni red etken cemiyet tiklenmesine qoltutmaq qararımıznı eminliknen beyan etemiz.

Bu munasebetnen biz Ukraina Prezidenti, Ukraina Yuqarı Radası ve Nazirler Şurasından Ukraina devleti insan ve halqlarnıñ uquqlarını qorçalav boyunca halqara qanunlarğa boysunmasını talap etemiz.

Biz ÖBSE, Avropa Şurası ve Avropa Birligine muracaat etip, kommunist rejimi tarafından genotsid siyasetine oğratılğan, bugünde-bugün öz Vatanına qaytayatqan qırımtatar halqına aq-uquqlarını ğayrıdan tiklevde yardım etmesini rica etemiz.

Avropa halqlarınen beraber millionlarnen stalinizm ve milletçilik qurbanları hatırasınıñ ögünde başlarımıznı egemiz.

Bizim borcumız ve vazifemiz – barışıqlıqnı saqlamaq, cemi halqlar ve insanlarnıñ serbest ve munasip inkişafı içün degerli şaraitler yaratmaqtır.

Kütleviy sürgünlik ve qatl qurbanlarınıñ hatırasını saqlamaq içün Umumavropa stalinizm ve natsizm qurbanlarınıñ hatırasına bağışlanğan Bütünqırım mitinginde qabul etildi.

Aqmescit ş.
2011 senesi avgust 23