«Küreşiñiz – yeñersiñiz!»

09 Mart 2012

Aqmescitniñ merkezinde ulu ukrain şairi, yazıcı ve ressamı Taras Grigoryeviç Şevçenko doğğanınıñ 198 yıllığı şerefine tantanalı mitingge onıñ adını taşığan bağçadaki eykeli yanında Qırım paytahtınıñ cemaatçılığı toplandı.

Er yılı olğanı kibi tantanalı miting ve Taras Şevçenko eykeline çeçekler qoyuv merasiminde qırımtatar halqı milliy areketi, Milliy Meclis ve qırımtatar gençler teşkilâtlarınıñ azaları da iştirak ettiler.

Tantanalı miting iştirakçileri ögünde çıqışta bulunğan Milliy Meclis reisiniñ birinci muavini, Qırım Yuqarı Şurasınıñ deputatı Refat Çubarov böyle dedi:

“Zemaneviy ukrainlerni biri-birilerinen daa da sıqı bağlamaq içün dünyada çoq şey – ukrain toprağı, tuvğan til, öz devletçiligi bar kibi kele. Amma mında da çeşit problemler mevcut. Amma bahtqa qarşı, Ukraina tarihında Taras Şevçenko kibi sıma bar eken, onıñ istidatlı eserleri ve ölmez vasiyetleri er bir ukrainge bugünki qarama-qarışıq vaqıtta doğru yolnı köstere.

Eger menden kimdir Şevçenko vasiyetleriniñ manasını eki söznen ifadelemekni rica etse, men ulu Kobzarniñ “Kavkaz” adlı poemasından ölmeycek şu sözlerini ketirir edim : “Küreşiñiz – yeñersiñiz!”.

Amma, teessüf ki, bazıları Taras Şevçenko köstergen yoldan ketemiz, dep amelde onıñ ğayelerini bozdılar ve öz küreşini ukrain milletiniñ deası arzulağan Ukrainanı qurmağa keder etkenlerge qarşı degil de, öz fikirdeşlerine qarşı doğrultalar.

Aydıñız, şu sözlerniñ manasını unutmayıq ve kelecegimiz içün berarer areket eteyik ki, er bir halq çastlı olsın. İşte, öz aqlarımız içün küreşeyik, lâkin qomşularımıznıñ da aqlarını untumayıq. Taras Şevçenkonıñ daa bir vasiyetine riayet eteyik: “Özüñizninqden utanmañız, başqalarından da ögreniñiz!”

Men eminim ki, Ukraina ve bizim tuvğan Qırımımızda öyle bir zaman kelir ki, adalet tiklenir ve er kes teñ olıp, biri-birini ürmet eter. Aynı şunıñ içün de mında bu tedbirde ukrain cemiyetinen omuzğa-omuz berip qırımtatar halqı milliy areketiniñ veteranları, Qırımtatar halqı Meclisiniñ azaları ve qırımtatar gençler teşkilâtlarınıñ azaları turmaqta”.

“Bugün biz bütün dünyada abide ve eykelleri pek çoq olğan bir insannıñ hatırasını añmaq içün toplandıq, – dedi öz çıqışında “Front Zmіn” Qırım teşkilâtınıñ başı Aleksey Burbak. – Men ukrain sözüniñ tek keçmişi degil de, kelecegi olacağını ve biz onı beraber quracağımıznı isteyim. T. Şevçenko ögünde çeşit milletler, çeşit din ve çeşit firqa vekilleri toplanğanından pek memnünim ve er keske teşekkür bildirem. Sağ oluñız!”

Ulu Kobzarniñ hatırasını añmaq içün Aqmescit ve Qırım mitropoliti Lazar, Ukraina halq partiyası Qırım teşkilâtınıñ reisi Öleg Fomuşkin, Ukraina Milletçiler kongressi Qırım bölüginiñ başı Vasiliy Ovçaruk da keldiler. Mitingniñ soñunda Taras Şevçenko eykeline çeçekler qoyulıp, er kes Ukrain muzıkalı teatrine Taras Şevçenko doğğanınıñ 198 yıllığına bağışlanğan kontsertke davet etildi.

Foto:   Vladimir Pritula ve Meclis matbuat hızmeti