Rustem Menumerov Boğdan Hmelnıtskıy nişanınen taqdirlendi

02.01.2026

MPBİniñ Donetsk vilâyetindeki mahsus (atıcı) polis batalyonınıñ komandanı polis podpolkovnigi Rustem Menumerov Ukrayina Prezidentiniñ 1010/2025 nomeralı buyruğına binaen III-nci dereceli Boğdan Hmelnıtslıy nişanınen taqdirlendi.

İlk qış ayınıñ 31-nde Facebook saifesinde Milliy polisiniñ Donetsk vilâyetindeki Baş idaresiniñ yolbaşçısı Ruslan Osıpenko bunı bildirdi.

“Bu yüksek mukâfatnı cesaret, uruş meydanında dayanıqlıq, qardaşlarıñızğa ve Ukrayinağa sadıqlıq qazanğan. O, bütün arbiy bölükniñ cesürliginiñ tanılmasıdır. Bu, ğalebe qazanmaq içün qararlarnı almağa ve taqımdaki er bir insan içün mesüliyetke çekmege qabiliyet aqqındadır”, – dep yazdı o.

Aynı zamanda Rustem Menumerov işanç içün teşekkürler bildirdi:

“Menim içün bu, hızmetimniñ qıymetidir. Er kün duşmannı yoq etken bölügimniñ reytingidir”.

Rustem Menumerov cenk areketleriniñ iştirakçisi, cenk veteranı ola.

O, 1993 senesi Donetsk vilâyetiniñ Granitne köyünde doğdı. 2013 senesi hızmet etmege başladı. 2014 senesi Militsiyanıñ Donetskteki Baş idaresini qorçalağanda yaralandı. 2015 senesi, “Sokol” Teşkil etilgen cinayetçiliknen küreş idaresiniñ (TCKİ) mahsus bölüginde hızmet etkende, diversiya-istihbarat gruppasını yaqalağanı içün III-nci dereceli “Cesürlik” nişanını aldı. 2017 senesi Operativ-acele areket korpusınıñ (OAAK) idare bölüginiñ yolbaşçısı vazifesinde hızmet etip başladı.

Tolu miqyaslı istilânıñ başında Mariupolda edi, mında “Azov” polkunıñ arbiy hızmetçileri ile beraber şeerni işğalcilerden qorçalağan edi. Saban ayınıñ ortasında, reberlikniñ emrinen, bölük şeerni terk etti. Aynı vaqıtta Rustemniñ doğmuş qardaşı – arbiy hızmetçi Eldar Menumerov – Mariupolda qaldı, anda 2022 senesi çiçek ayında esir alındı. 2024 senesi ilk küz ayınıñ 14-nde deñiştirüv çerçivesinde azat etildi.

2022 senesinden Rustem Menumerov Makarivka, Storojeve, Lıman, Svâtoğirsk meskün yerlerindeki qarşı ücüm ve temizlenüvde iştirak etken mahsus polis bölüginiñ komandanı oldı. 2024 senesi OAAKnıñ Donetsk vilâyetindeki idaresiniñ yolbaşçısı oldı.

2024 senesiniñ yazında polisniñ atıcı batalyonınıñ komandanı oldı, Nyü-York, Petrivka, Şçerbınivka yönelişlerinde hızmet ete edi. Motivatsiyası, cenk ruhu ve dayanıqlığı içün şahsiy terkibi Ukrayina Prezidentiniñ devlet nişanları ve İçki işler Nazirliginiñ nişanlarınen taqdirlendi.

Rustem Menumerov Ukrayina Prezidentiniñ “Ukrayinanı mudafaa etkeni içün” ve Birleşken quvetler komandanınıñ “Cesaret ve sadıqlığı içün” nişanlarına saiptir.