Qırımtatar siyasiy mabüsi Server Mustafayev halqara uquq qorçalayıcı mukâfatını aldı

21.05.2025

14 senege mahküm etilip Tambov apishanesinde bulunğan, mayısnıñ 5-nde tuvğan Bağçasaraydan biñ milâ uzaqlıqta 39-ıncı doğğan kününi qayd etken Kremlniñ qırımtatar siyasiy mabüsi, siyasiy mabüslerniñ soy-sopları, advokatlar ve “Qırım birdemligi” faalcileri birleşmesiniñ koordinatorı Server Mustafayev Freedom House tarafından yañı Alfred Moses Liberty Award mukâfatınıñ birinci laureatı oldı. Bunı AQŞdaki Ukrayinanıñ fevqulâde ve vekâletli elçisi Oksana Markarova bildirdi.

Freedom House Annual Awards mukâfatınıñ saytında qırımtatar faalcisine insan aqları ve demokratiya saasında issesi içün mukâfat berilgeni aqqında haber etildi.

“Freedom House tarafından tanılmaq, Ukrayina ve qırımtatar halqınıñ Rusiye tarafından yapılğan sert repressiyalarğa qarşı küreşiniñ müim hatırlatmasıdır. Kremlniñ qırımtatarlarğa qarşı cinayetleri ve Ukrayinağa qarşı genotsid cenki – Qırım İmperatorlığınıñ 1944 senesiniñ sürgünlikleri ve ukraiynlerge qarşı bütün diger cinayetlerniñ cezasız insan nefret siyasetiniñ devamıdır”, – dep Oksana Markarova Facebook saifesinde yazdı ve Server Mustafayevniñ adına bu mukâfatnı almaq, Serverni ve Kremlniñ diger reinelerini ve Rusiyeniñ qanunsız tutqan ukrainlerni hatırlamaq onıñ içün büyük şeref olğanını qayd etti.

Freedom House – Amerika teşkilâtı, 1941 senesi dünya natsistlerniñ zulumı ve yamanlığınen küreşken vaqıt meydanğa ketirilgen edi. Teşkilâtnıñ tesisçileri arasında Birinci hanım Eleonor Rusvelt ve cumhuriyetçi-siyasetçi Vendell Vilki bar. Er yıl Freedom House insan aqları ve demokratiya inkişafına qoşqan büyük isse içün insanlarnı ve olarnıñ gruppalarını taqdirley. Bundan evel mukâfatlarnı Tibetniñ maneviy lideri XIV Dalai Lama, Büyük Britaniya sabıq baş naziri Vinston Çurçill ve Amerika ırq musaviyligi faalcileri Martin Luther King Jr. aldılar.