Qırımtatar delegatsiyası Atlantik Şurasınıñ vekillerinen körüşti

12.09.2025

2025 senesi ilk küz ayınıñ 11-nde Kıyivde qırımtatar halqınıñ lideri, Ukrayina halq mebusı Mustafa Cemilev, Qırımtatar Milliy Meclisiniñ reisi Refat Çubarov, Qırımtatar Milliy Meclisiniñ reisiniñ muavini, Ukrayina halq mwbusı Ahtem Çiygöz ve Qırım milliy varlıq fondınıñ reisi Lenur Mambetov Atlantik Şurasınıñ (Atlantic Council) yetekçi hadimleri, 2003-2006 seneleri Ukrayinadaki AQŞ elçisi olğan John Herbst ve 2006-2009 seneleri Ukrayinadaki AQŞ elçisi olğan William Taylor ile körüştiler.

Uzun ve meraqlı subet devamında körüşüv iştirakçileri Rusiye-Ukrayina cenki boyunca Amerika-Ukrayina dialogınıñ şimdiki vaziyetini muzakere ettiler. Añlaşılır ki, esas diqqat ukrayin Qırımınıñ kelecegi ve tamır qırımtatar halqınıñ taqdirine ayırıldı.

Körüşüv iştirakçileri, Rusiye Federatsiyası tarafından işğal etilgen Qırımdaki vaziyetniñ hususiyetleri ve qırımtatar halqı ögünde olğan kerçek telükelerni Amerika siyasetçileri ve cemaatına añlatmaq içün bir sıra ortaq areketni belgilediler.