«Krım» DTRK qırımtatar yayınları icadiy birleşmesiniñ inkişafı meseleleri boyunca toplaşuv oldı

12 Iyün 2012

2012 senesi iyün 11 künü Qırımtatar halqı Meclisiniñ reisi, Ukraina halq deputatı Mustafa Cemilev, onıñ birinci muavini, Qırım Yuqarı Şurasınıñ deputatı Refat Çubarov Qırım İnformatsiya boyunca cumhuriyet komitetiniñ reisi Vadim Volçenko ve “Krım” DTRK baş direktorınıñ birinci muavini Stepan Gülevatıy ile körüştiler. “Krım” DTRK binasında keçken toplaşuvda “Krım” DTRK baş direktorınıñ televideniye boyunca muavini İrina Müld, “Krım” DTRK qırımtatar yayınları icadiy birleşmesiniñ direktorı Seytislâm Kişveyev, Meclisniñ informatsion siyaset ve cemaat teşkilâtlarnen alâqa idaresiniñ başı Şevket Qaybullayev ve Meclis Kâtibiyetiniñ başı Zair Smedlâyev iştirak ettiler.

Belli ki, keçenlerde “Krım” DTRK yolbaşçıları qırımtatar muarririyet hadimlerinden 13 daqqalıq “Haberler” programmasına er kün Ukraina Prezidenti ve Ukraina Nazirler Kabineti faaliyetini aks ettirgen levhalarnı kirsetmekni talap ettiler. Neticede, “Haberler”de qırımtatar halqı ve Qırımnıñ siyasiy, sotsial ve medeniy ömürini köstermek içün aslı da vaqıt qalmaycaq.

İşte, olıp keçken şu vaqia körüşüv iştirakçileriniñ muzakere mevzusı oldı. Bunıñ kibi de olar muarririyet maddiy-tehnikiy bazasınıñ zayıflığı, qırımtatar tilinde yayınlar vaqtı olğanı-olacağı 26 daqqa olıp, bazar künleri ise umumen berilmegenini qayd ettiler.

Seitislâm Kişveyevniñ aytqanına köre qırımtatar tilinde informatsion programmalar muarririyeti Ukraina Devlet teleradiosı ve DTRK yolbaşçılarınıñ talaplarını qanaatlendirmege azır, amma 13 daqqalıq programma içinde bunı yapmaqnıñ iç imkânı yoqtır. “Şunıñ içün biz “Haberler” programmasına daa 10 daqqa qoşulmasını isteymiz, o zaman bizim künde em regional ve devlet vaqialarını, cümleden devlet reberleriniñ teşebbüslerini de açıqlamaq imkânımız olur”, – dedi Kişveyev.

Öz nevbetinde Qırım İnformatsiya boyunca cumhuriyet komitetiniñ reisi Vadim Volçenko qırımtatar tilinde haberler vaqtını deñiştirmekni, yani 18.15-te degil de evelkisi kibi saat 18-de başlamaqnı teklif etip, haberler hronometrajını 26 daqqağa qadar arttırmaq aqqında yuqarıdaki reberlerge muracaat etmege söz berdi. “Krım” DTRK baş direktorınıñ birinci muavini Stepan Gülevatıy ise qırımtatar icadiy birleşçmeniñ maddiy-tehnikiy bazası kerçekten de zayıf olğanını tanıyaraq, kanalnıñ tender vaziyetini deñiştirüv boyunca teklifnen çıqacağını işandırdı.

Meclis reisi Mustafa Cemilev ve onıñ birinci muavini Refat Çubarov qırımtatar tilinde yayınlar altındaki yazıları tek devlet tilinde, yani ukrain tilinde olmaq kerek, dep sayalar.

Bundan da ğayrı, Meclis yolbaşçıları Ukraina Televideniye ve radio meseleleri boyunca milliy şurağa DTRK “Krım” litsenziyasına qırımtatarlarnıñ yarımada ealisine nisbeten fayızını ve buña köre DTRK “Krım” öz yayınları til strukturasına deñişmeler kirsetilmesi teklifinen muracaat etmek zarurlığını qayd ettiler.

Körüşüv devamında Meclis reisiniñ birinci muavini, Qırım Yuqarı Şurasınıñ deputatı Refat Çubarov Qırım İnformatsiya boyunca cumhuriyet komitetiniñ reisi Vadim Volçenkoğa hıtap eterken, ileride kollektivni idare etüvde edepsiz areketlerden qaçınmaqnı tevsiye etti.

Körüşüv soñunda iştirakçileri “Krım” DTRK qırımtatar yayınları icadiy birleşmesiniñ inkişafı meselelerini çezüvde areketlerni birleştirmek lâzimligini qayd ettiler.