Kölnde Meclis reisi Mustafa Cemilevniñ şerefine aqşam yemegi

03 May 2013

Aprel 26 künü aqşam Almaniyadaki qırımtatar diasporası Qırımtatar halqı Meclisiniñ reisi Mustafa Cemilevniñ reberligindeki Meclis delegatsiyasınıñ Kölnge kelüvi munasebetinen aqşam yemegi berdi. Bütündünya qırımtatarlar kongressi Koordinatsion keñeşiniñ Almaniyadan azası Ahmet Ozay alıp barğan bu tedbirde Almaniyanıñ türk ve musulman cemiyetleriniñ yolbaşçıları, Avropadaki yetekçi türk kütleviy matbuat vastalarınıñ vekilleri de bulundılar.

Cümleden, yemekte musafirler arasında Ğarbiy Frakiya Türkler Avropa federatsiyasınıñ reisi Halit Habipoglu ve onıñ muavini Mustafa Qasap, “Alperen ocaqları” cemiyetiniñ reisi Muharrem Qılıqaya, “Aydınlıq” gazetasından Erdem Buyruqçı, Avropa Türk-islâm birliginiñ prezidenti İhsan Öner, Avropada Qırımtatar yardımlaşma ve medeniyet derneginiñ reisi Rafet Qaranlıq, Belçika qırımtatarlar komitetinden, jurnalist Huseyin Donmez, Köln şeer şurasınıñ “Hristian demokratik partiya”sından azası Erfan Qara, Frantsiya qırımtatar medeniyet ve yardımlaşma derneginiñ vekili Halil Aydemir, İslÂm –medeniyet merkezi direktorları keñeşiniñ azası Ersoy Sam, Niderlandda Türk demokratları birliginiñ vekili Ali Kılıçarslan, kanal “Yevropa” (“Kanal Avrupa”)dan Ali Rasa Akbas , Kölnde Baş konsullıqnıñ emek meseleleri boyunca attaşesi Öguz Tuncay, Avropa Milliy pozitsiya islâm cemiyetiniñ baş kâtibi Öguz Üçünci, Türkiye Gazetesinden Cemal Oztaş, “Sabah” gazetasından İbrahim Taş , Türk-alman dostluğı merkezinden Hicabi Saglam, Almaniyada Türkiye demokratları Birliginiñ vekili Metin Sirin, Şimaliy Reyn-Vestfaliyadaki “yeşiller” partiyasından parlamentte deputat Mustafa Gungor , Qatıluv devlet komissiyasınıñ reisi Arif Unal yer aldılar.

Qırımtatar delegatsiyasını Meclis tışqı alâqalar bölüginiñ başı Ali Hamzin, Kiyevde qırımtatarlar cemiyetiniñ reisi Aslan Ömer Qırımlı ve Qurultay delegatı Rustem Ümerov temsil ettiler.

Meclis reisi qırımtatar halqınıñ bugünki alı ve halqnıñ ömürinde olıp keçken soñki vaqialar aqqında tafsilâtlı şekilde añlattı. M. Cemilevniñ söylegenine köre, Ukraina ve Qırım akimiyet organları soñki vaqıtta qırımtatar halqınıñ aqlarını qorçalamaq içün 1917 senesi qurulğan Qurultaynı fesat işletip maqsadlı şekilde yoq etmege çalışalar.

Yemek vaqtında iştirakçiler fikir paylaşıp, er kes öz noqtai nazarini ifade etti ve yapıcı tekliflerni seslendirdi. Qırımnıñ baş naziri A. Mogilöv qırımtatarlarğa qarşı açıqtan-açıq nefretni teşviq etkeni, kütleviy matbuat vastaları arqalı 1944 senesi sürgünlikni aqlağanı, 2007 senesi Ay-Petr dağınıñ töpesinde bronetehnika ve silâ yardımında qırımtatarlarnıñ qurulmalarını darma-dağın etkeni, bugün ise Qurultay-Meclisni yoq etüvniñ baş teşebbüsçisi olğanı tedbir iştirakçileri tarafından keskin qaralandı.

Qırımda Mogilövnıñ teşebbüsinen akimiyet organlarından qırımtatarlarnı milliy mensüpligi ve vekâletli organğa yaqınlıqları içün işten boşatılğanları ayrıca muzakere etildi.

Körüşüvde Qırım ükümetiniñ başı, qırımtatarlarğa nisbeten millet ayıruv keyfi ve areketlerinen belli olğan bu iğrenç kişi Qırım musulmanlarına nisbeten “ukrain Miloşeviçi” rolüni oynamağa azırlana ğaliba. Qırımda qırımtatar halqına nisbeten iç tüşünilmegen ve ögü qapalı siyasetke Ukraina merkeziy akimiyeti hadimleri lâqayd yanaşqanları tedbir iştirakçilerini açuvlandırdı. Yemek musafirleri Avropa Birligi hududında Türkiy cemaat teşkilâtlarınıñ vefqulade qurultayını teşkil etmege azır olğanlarını bildirdiler. Bunıñ kibi de Ukrainada qırımtatarlarnıñ aqlarını qorçalav boyunca leyhalar seslendirilip, şu leyhalarnıñ keniş dünya cemaatçılığına bildirilmesi hususında fikir paylaşıldı.

Ziyaret devamında Meclis reisi Mustafa Cemilevnen beraber Kölnde Meclis tışqı alâqalar bölüginiñ başı Ali Hamzin, Kiyevde qırımtatarlar cemiyetiniñ reisi Aslan Ömer Qırımlı ve Qurultay delegatı Rustem Ümerov bulundılar.