Qırımtatar tilinde kitaplar Çehiya Cumhuriyetiniñ ukrayin raflarında taqdim etilecek

25.08.2025

Ukrain kitapları endi Çehiya Cumhuriyetiniñ Brno şeheriniñ esas kitaphanesinde bar.

Taqdim etüv vaqtında Ukrayina birinci hanımı Olena Zelenska video vastasınen muracaat etip, bu leyhanıñ esas vazifesini hatırlattı – bilgi, añlav ve işbirlikni arttırmaq:

“Bu raf, tek kitaplarnıñ toplamı degil. Bu, Rusiye istilâsı sebebinden Brnoda yañı ev tapqan ukrayin balaları ve qorantaları içün ana tilini eşitmek ve oqumaq içün bir yerdir. Aynı zamanda bu, çeh oquyıcıları ukrayin edebiyatı, tarihi ve medeniyetinen tanış ola bilecek bir yer. Bu raflardaki er bir kitap – halqlarımız arasında bir köpürdir – dayanıqlıq, ümüt ve dostluq ikâyesidir”.

Ukrayinanıñ Çehiya Cumhuriyetindeki Fevqulâde ve Vekâletli Elçisi Vasıl Zvarıç öz çıqışında qayd etti ki, Brno şeherindeki kitap rafınıñ unikalligi şunda ki, ukrayin kitapları arasında ilk sefer qırımtatar tilinde de eserler teklif etile.

“Bu küçlü bir timsal. Böyleliknen bizler Ukrayina yekâne olğanını bildiremiz. Qırım – bu Ukrayina. Qırımtatar edebiyatı ise, Ukrayina devletiniñ medeniy mirasınıñ ayırılmaz bir parçasıdır”, – dedi o.

Birinci hanım Olena Zelenska Tış işler nazirligi, Medeniyet ve malümat siyaseti nazirligi, “Ukrayina kitap institutı” ve kitaphanelerge kitaplarnı berüvnen oğraşqan Ukrayina elçihanelerinen beraberlikte, atta tolu miqyaslı istilâdan evel Ukrayina kitap raflarınıñ yaratılması teşebbüsini başlatqan, ve o vaqıttan berli olar düynanıñ çoq memleketinde peyda oldılar.