Mustafa Cemilev aqqında kitapnıñ taqdim etilmesi ve Türkiye parlamentinde körüşüv

18.12.2025

İlk qış ayınıñ 18-nde qırımtatar halqınıñ lideri, Ukrayina halq mebusı Mustafa Cemilev, Ukrayina halq mebusı Kostântın Kasay ve Qırımtatar Milliy Meclisiniñ reisiniñ muavini, Ukrayina halq mebusı Ahtem Çiygözden teşkil etken Ukrayina eyyeti Ankaranı ziyaret etti.

Ziyaret çerçivesinde eyyet Türkiye Cumhuriyeti Büyük milliy Meclisiniñ Türkiye-Ukrayina Dostluq gruppasınıñ temsilcilerinenkörüşti, körüşüv devamında vaqtınca işğal etilgen Qırımdaki vaziyet, yarımadada insan aqlarınıñ sistematik bozuluvı, qırımtatarlarğa qarşı taqipler ve Ukrayinağa halqara destekniñ kerekligi muzakere etildi. Körüşüvde Türkiyedeki Ukrayina Elçisi Nariman Celâlov ve Qırım milliy varlıq fondınıñ reisi Lenur Mambetov da iştirak ettiler.

Mustafa Cemilev Qırım meselesiniñ printsipial olğanını ve halqara uquq qaideleriniñ bozulmamazlığını qayd etti:

“Elbette, şimdi dünyada er kes adaletli barışıq istegenini ayta, amma adaletniñ añlamı er kesniñ özüdir. Rusiye içün adalet – ukrayin topraqlarını işğal etüv ve olarnı Rusiye topraqları olaraq tanımadır. Soñ olar tınçlanırlar. Bizim içün adalet halqara uquq qaidelerine esaslana”.

Ahtem Çiygöz çıqışta bulunıp, türk zenaatdaşlarını Ukrayinağa kelip, cenk şaraitinde er kün ukrayin halqınıñ qarşılaşqanı qıyınlıq ve çağıruvlarnı öz közlerinen körmege davet etti.

Ankara ziyaret etkende müim bir vaqia qırımtatar halqınıñ lideri Mustafa Cemilevniñ ayat yoluna ve qırımtatar milliy areketiniñ tarihına bağışlanğan “Vatana Adanmış Ömür: Mustafa Kırımoğlu” kitabınıñ taqdim merasimi oldı.

Kitap Mustafa Cemilevniñ qırımtatarlarnıñ aqları oğrunda çoq yıllıq zorbalıqsız küreşini, hususan sovet repressiyaları, sürgünlik ve apis müddetini, em de zemaneviy qırımtatar milliy areketiniñ şekillenmesinde rolüni aydınlata.

Taqdim etüvde, eyyet azalarından ğayrı, Ukrayinanıñ Türkiyedeki elçisi Nariman Celâlov, Qırımtatar Milliy Meclisiniñ azası Gayana Yüksel, Qırım milliy varlıq fondunıñ reisi Lenur Mambetov, Türkiye medeniyet ve turizm naziriniñ muavini Serdar Çam, Türkiye işbirlik ve koordinatsiya agentliginiñ (TİKA) yolbaşçısınıñ muavini Mahmud Çevik, Türkiye ükümeti yanında çetel memleketlerde diaspora ve semetdeşler meseleleri idaresiniñ yolbaşçısı Abdulhadi Turus, Türkiye tarihiy cemiyetiniñ prezidenti professor Yüksel Özen, Avraziya yazıcılar birliginiñ reisi Ufuk Tuzman, qırımtatar cemiyetiniñ vekilleri, YTB hadimleri ve jurnalistler iştirak ettiler.

Taqdim etüv vaqtında tedbir iştirakçileri Mustafa Cemilev qırımtatar halqınıñ öz toprağında yaşamaq aqqı, serbestligi ve menligi oğrunda küreşiniñ timsali olğanını qayd ettiler. Kitap tek biografik tetqiqat degil, qırımtatar halqınıñ sürgünligi faciasınıñ, Qırımğa qaytuv esnasınıñ ve yarımadanıñ Rusiye işğalinen bağlı zemaneviy çağıruvlarnıñ müim tarihiy şaatı ola, dep qayd etildi.

YTBniñ resmiy saytında ya da Türkiye ve Ukrayina kitaphanelerinde bu kitapnı satın almaq mümkün. Çetelde yaşağan türklerniñ işleri idaresiniñ ve yaqın cemiyetlerniñ desteginen kitp bastırıldı.

Soñra Türkiyedeki Ukrayina Elçihanesi bazasında Ukrayina halq mebusları Mustafa Cemilev, Ahtem Çiygöz ve Kostântın Kasaynıñ Ankaranıñ ukrayin ve qırımtatar cemiyetiniñ vekillerinen açıq körüşüvi olıp keçti.

Фото: Гаяна Юксель та Наджіє Аметова.