Kiyevde Sovetler Birliginiñ Eki defa qaramanları , meşur uçucılar Amethan Sultan ve Georgiy Beregovoy eykelleriniñ açılışı oldı

02 May 2013

Kiyevde mayıs 1 künü Şan- şüret bağçasında arbiy şüret soqağında Sovetler Birliginiñ Eki defa qaramanları , meşur uçucılar Amethan Sultan ve Georgiy Beregovoy eykelleriniñ tantanlı açılışı oldı.

Merasimde Ukraina baş naziri Nikolay Azarov, Kiyev şeeri devlet memuriyetiniñ reisi Aleksandr Popov ve ükümet azaları iştirak ettiler.

Azarovnıñ aytqanına köre böyle eykeller qoyulması Ekinci dünya cenkini unutmağa bermey ve öseyatqan nesilni vatanperverlik ruhunda terbiyelev vastasıdır. Baş nazir şunı da qayd etti ki, Şan-şüret bağçasında arbiy şüret soqağınıñ qurucılığı 2015 senesine yani Ekinci cian cenkinde elde etilgen ğalebeniñ 70 yıllığına bitirilecek.

Bundan da ğayrı, soqaqta Ukrainada doğğan, Ukrainanı azat etüvde iştirak etken, mında defn etilgen ve ya da yaşağan 14 nefer Sovetler Birligi Eki defa qaramanlarınıñ eykelleri qoyulacaq.

Açılış merasiminde Kiyevdeki qırımtatarlar cemiyetiniñ vekilleri de iştirak etken medeniy inkişaf komitetiniñ başı Femiy Mustafayev, tışqı alâqalar koordinatorı Remzi Abkerimov, medeniy inkişaf komitetiniñ koordinatorı Zera Halilova Meclis ve Kiyevdeki qırımtatarlar cemiyeti adından Amethan Sultan eykeline gülçemberler qoydılar.