Kiyevde Qırımtatar halqı Qurultayına delegatlar saylandı

27 May 2013

Saylav uçastkası öz işini saa 8.00-de başladı

Saylavlarda Merkeziy saylav komissiyasınıñ reisi Zair Smedlâyev bulundı. Saylavlarnıñ ketişatını Commitee For Open Democracy – Halqara Cumhuriyet İnstitutından tayinlengen halqara nezaretçiler ve Amerikanıñ Ukrainadaki Elçiliginiñ ekinci kâtibi Stiven Peyc, bunıñ kibi de cemaat teşkilâtları ve olarnıñ blokları, namzetlerniñ vekilleri közettiler.

Rey berüv neticelerine köre Qırımtatar halqı VI çağırılış Qurultayına Kiyev ve Kiyev vilâyeti boyunca bir mandatlı 45-nci saylav dairesinden delegat olaraq saylavcılarnıñ 80 fayız reylerini qazanğan Kiyevdeki qırımtatar cemiyetiniñ başı Aslan Ömer Qırımlı saylanğanı tanıldı.

Proportsional sistem boyunca dairede saylavcılarnıñ 29 fayız reylerini qazanğan “Bizim Qırım” Halqara cemaat teşkilâtı ögge çıqtı. “Milliy haq” saylav blokı 19 fayız rey alıp – ekinci ve 12 fayız rey qazanğan “Maarifçi” birleşmesi –uçünci yerge çıqtılar.

Halqara nezaretçiler saylav aşkârlığınıñ yüksek seviyesini qayd ettiler.
Şunı hatırlatmalı ki Qurultayğa delegatlar saylav yañı saylav sistem boyunca doğrudan-doğru, musaviy aq esasında gizli rey berüv yolunen keçirilmekte.

Saylavlar qarışıq (majoritar-proportsional) sistem boyunca ötkerilip, 200 delegat majoritar sistem boyunca çoqmandatlı saylav dairelerinde, 50 delegat – bir mandatlı saylav daireden qırımtatar cemaat ve siyasiy teşkilâtları ve olarnıñ bloklarından keçirilmekte.