Kiyev şeerindeki qırımtatarlar cemiyeti Kiyev regional meclisini meydanğa ketirüv teşebbüsinen çıqtı

24 December 2012

2012 senesi dekabr 22-de Kiyev şeerindeki qırımtatarlar cemiyeti Kiyevde yaşağan, oquğan, çalışqan ya da vaqtınca bulunğan semetdeşlerniñ umumiy toplaşuvını keçirdi. Toplaşuvda cemiyet idaresi keçken devir zarfında yapılğan iş aqqında esabat berdi.

“Toplaşuvda bulunğanlar esap devrindeki teşebbüslerge qoltuttılar”, – dep haber ete cemiyetniñ matbuat hızmeti. Bundan da ğayrı cemiyetniñ kelecekte yapacaq işleri de muzakere etildi. Cümleden – Qırım Medeniyet merkezi, Call Centre 24/7, Kiyevniñ içtimaiy ve medeniy ömürinde iştirak etüv. Bunıñ kibi de cemiyetniñ tasil, sport, qadınlar ve balalar, hayriye ve medeniyet saalarında faaliyetini kenişletmek teklif etildi.

Toplaşuvda seslendirilgen teklif ve teşebbüsler muzakere etilgen soñ kelecek toplaşuvda tasdiqlanması içün qoyulacaq. Bu işke Kiyevde yaşağan bütün semetdeşlerimiz celp etilecek.

Şunı da qayd etmeli ki, Cemiyet vekilleriniñ teşebbüsinen Kiyev regional meclisini meydanğa ketirüv teklifi kirsetildi. “Teşebbüs umumiy toplaşuv iştirakçileri tarafından maqullendi. Toplaşuv qararı boyunca Kiyevde yaşağan semetdeşlerimizniñ imzalarınen tasdiqlanğan muracaatnı cemiyet reisi Aslan Ümerov Qırımtatar halqı Meclisiniñ reisine yollaycaq”, – denile cemiyet matbuat hızmetiniñ haberinde.

Cemiyetniñ nevbetteki toplaşuvını 2013 senesi fevral 23-te keçirmek planlaştırıla. Cemiyet faaliyetinine dair teklif ve mulâazalarnı Cemiyet koordinatorı Alim Veliullayevge şu telefon nomeri 063 3531088 ve Alim.Veliulaev@gmail.com. elektron adresine yollamaq mümkün.