Kezlevdeki Han Camide Qurultay delegatı, Qırım Nazirler Şurası reisi muavini Aziz Abdullayevniñ anası Nuriye Acimamut vefat etkeniniñ 100-nci künü munasebetinen dua keçirildi

18 Avgust 2012

2012 senesi avgust 18 künü Ramazan ayınıñ soñki künü ve Oraza bayram arfesinde Kezlevde Han Camide Qurultay delegatı, Qırım Nazirler Şurası reisi muavini Aziz Abdullayevniñ anası Nuriye Acimamut qızı vefat etkeniniñ 100-nci künü munasebetinen dua keçirildi.

Adetimizge köre Han Camide Nuriye Acimamut qızınıñ ruhuna dua oquldı ve soñra aqşam namazı qılındı.

Aziz Abdullayev ve Kezlev regional meclisniñ qoltutuvında berilgen iftarda 200-den ziyade insan iştirak etti.

Olar arasında Qırımtatar halqı Meclisiniñ reisi Mustafa Cemilev, onıñ birinci muavini, Bütündünya qırımtatarlar kongressiniñ prezidenti Refat Çubarov, Merkeziy Meclis ve regional meclislerniñ azaları, QMPU rektorı Fevzi Yaqubov, Ukraina Prezidentiniñ Qırımdaki daimiy temsilcisiniñ muavini İbraim Mamutov, Qırım Müftiligi, qırımtatar cemaatçılığınıñ vekilleri, Aziz Abdullayevniñ aqrabaları ve dostları bar ediler.

İftardan soñ caminiñ imamı Elmar Abdulğaniyev dua oqudı.

Meclis reisi Mustafa Cemilev duada bulunğanlarnı ve umumen er kesni musulman dünyasınıñ eñ büyük eki bayramdan biri – keleyatqan mubarek Oraza bayramınen samimiy hayırlap, qaviy sağlıq, quvanç, sabır-taqat tiledi. “

Yüce Allah Vatanımızda daa çoq bayramlarnı qayd etmekni nasip etsin. Bizim vazifemiz milliy ve diniy birligimizni qorçalamaq ve pekitmektir”, – dedi Mustafa Cemilev.