Menu 
Kezlevde hayriye aqşamı ötkerildi
02 Iyün 2011
İyün 1 künü Kezlevdeki “Ceval” adlı milliy restoranda üç ağır hasta balağa maddiy yardım toplav maqsadında “Yardım bergen eller, dua etken ellerden hayırlıdır” hayriye aqşamı ötkerildi. Halqara balalarnı qorçalav kününe uydurılğan mezkür tedbirni Kezlev şeeriniñ “Odun bazar qapısı” medeniy-milliy merkezi teşkil etti. “Bu tedbirni keçirmekten maqsad – hasta balalarğa yardım etmek ve bunıñ kibi de balalarnıñ meselelerine lâqayd olmağanlarnıñ episine yardım köstermekni teklif etmek edi”, – dedi “Ceval” restoranınıñ direktorı Dilâra Yaqubova Qırım haberler agentligine.
Bütündünya qırımtatarlar kongressiniñ prezidenti Refat Çubarov, Qırım Nazirler şurası reisiniñ muavini Aziz Abdullayev, Qırım içtimaiy siyaset naziri Yelena Semiçastnaya, Ukraina Prezidentiniñ Qırımdaki daimiy temsilcisi Vladimir Yatsuba, Kezlev meri Andrey Danilenko, Bağçasaray rayon devlet memuriyetiniñ başı İlmiy Ümerov, siyasetşınas Aleksandr Formançuk, tarihçılar Gülnara Bekirova ve Öleksa Gayvoronskiy hayriye aqşamnıñ fahriy musafirleri oldılar.
Aqşam programmasında halq ustaları Rustem Skibin, Tamara Klüçkina, Ramiz Netovkin ve digerleriniñ, şu cümleden şeerdeki balalar bediiy mektebiniñ talebeleri yapqan mahsulatlardan ibaret sergi numayış etildi. Hayriye aktsiyasına büyük isse qoşqan genç ve istidatlı dizayner Halide Çilingirova da kendisiniñ “Kiyiz sırı” adlı libaslar kollektsiyasını taqdim etti. İstegenlerniñ episi mında begengen şeylerni satın alıp, onkologiya hastalığına oğrağan balalar içün sermiya toplav işine qoşuldılar.
Dilâra Yaqubovanıñ aytqanına köre, aqşam devamında 40 biñ grivnâğa yaqın para toplanıp, Kezlev şeerinden bir yaşındaki Darina, Yusup Suleymanov, bunıñ kibi de Saq rayonında yaşağan Amina Qurtveliyevanıñ ana-babaları arasında taqsim etildi.
“Biz bu aqşamnı nasıldır bir mezatqa çevirmeden, hayriye şekilinde keçirmege tırıştıq”, – dedi Dilâra Yaqubova ve aqşamnı böyle müitte ötkerilmesini teminlegen yırcı Aliye, dizayner Halide Çilingirova, “Haytarma” ansambliniñ sanatçılarına, ustalar – Rustem Skibin, Tamara Klüçkina, Ramiz Netovkinge ayrıca teşekkürlerini bildirdi.
QHA ve “Odun-Bazar” milliy medeniy merkezniñ malümatları boyunca
