Kastamonu, Sinop ve Çankara şeerleriniñ yolbşaçıları Qırımtatar halqı Meclisiniñ ofisini ziyaret ettiler

21 Mart 2011

Şimaliy Anadolu inkişafı agentliginiñ Kastamonu, Sinop ve Çanqara şeerleriniñ yolbaşçıları, şu şeerlerdeki departament ve idarelerniñ reberlerinden ibaret delegatsiyası bu künlerde resmiy ziyaretnen Qırımda bulunmaqtalar.

2011 senesi iyül 20-den başlanğan ziyaret çerçivesinde türk delegatsiyası Türkiye Cumhuriyetiniñ Odessa şeerindeki Baş konsulı Husöyn Ergani ve Türkiye Cumhuriyetiniñ Qırımdaki Fahriy konsulı Seyran Osmanov ile beraberlikte iyül 21 künü Qırımtatar halqı Meclisiniñ reisi Mustafa Cemilev, Bütündünya qırımtatar kongressiniñ prezidenti, Milliy Meclis reisiniñ birinci muavini Refat Çubarov ve tışqı alâqalar bölüginiñ başı Ali Hamzin ile körüştiler.

Türkiyeli musafirleriniñ bildirgenine köre, Qırımğa iş ziyareti devamında olar Qırım Nazirler şurasınıñ rehberleri ve bir sıra Qırım şeerleri ve rayonlarınıñ valilerinen resmiy körüşüvler keçirip, Qırım ve delegatsiya azaları temsil ettigi şeerler arasında sotsial-iqtisadiy ve medeniy işbirlik, şu cümleden eki devletniñ yalı boyu şeerleri arasında yañı tranport bağını açmaq meselelerini muzakere etmek planlaştırıla. İşte, Sinop vilâyetiniñ valisi Ahmet Cengiz aytqanına köre, Sinop-Yalta deñiz yolu ve Simferopol-Kastamonu hava yolunı açmaq boyunca teklifler azır.

Öz nevbetinde Qırımtatar halqı Meclisiniñ reisi Mustafa Cemilev, Türkiye iş daireleriniñ Ukraina ve Türkiye arasındaki iqtisadiy ve medeniy alâqalarnı kenişletkenlerini alğışlap, amelge keçirilmekte olğan leyhalarda insan faktorınıñ müimligini qayd etti. Qırım ve qırımtatar halqınıñ inkişafı içün müim ve akutal meselelerni talil etip, Mustafa Cemilev ve Meclisniñ diger azaları qırımtatar halqınıñ i qtisadiy ve maneviy inkişafı saasındaki meselelerde tafsilâtlı toqtaldılar.

Taraflarnıñ fikrince Qırımnı körmek, onıñ potentsialını ögrenmek ve Qırımnıñ facialı tarihınen tanış olmaq, Qırımnıñ bugünki problemlerini belgilemek, olarnı çezuv yollarını tüşünmek imkânını bergen böyle ziyaretler Qara deñiz regionında barışıqlıq ve eyi qomşulıq munasebetlerini pekitüvge siltem olalar.