Jurnalist İrına Danılovıçnı SİZOdan tibbiy teşkerüvge ketirmeyler – aqrabaları

30 Mart 2023

İşğal “makeme”si tarafından patlayıcı aletni sanki saqlaması içün sahte davağa mücibi maküm etilgen içtimaiy jurnalist İrına Danılovıçnı içtimaiy hastahanege daa bir kere ketirmediler.

Babası Bronislav Danılovıç QIRIM.Newske bu aqqında haber berdi.

Onıñ sözlerine köre, saban ayınıñ 29-ında İrınanı başınıñ MRTe ketirmege olmalıalr.

– Meni yañıdan aldattılar, SİZOnıñ reberi şahsiy randevuda maña söz bergenine baqmadan. Ketirmediler, – dep maküm etilgen jurnalistniñ babası ayttı.

O qayd etti ki, Qırımdaki Federal hızmetniñ tibbiy idaresiniñ reberini ziyaret etip, qızını tibbiy teşkerüvge ve tedaviylevge ketirmege rica etti.

– Olar inandıralar ki, ayat telükesi yoq, İrına içün kerekli olğan ilâçlar SİZOda bar ve izolâtorğa oña berilgen ilâçlarnı almağa red eteler. FSİN sistemasınıñ er bir ekimi, TFHniñ kontrolı astındadır. Tüşünem ki, olar Buhenvaldda ya da nasıldır natsist toplama lagerinde staj yaptılar, – dep Danılovıç qoştı.

O qayd etti ki, onıñ qızı quru açlıq devam ete ve tolu teşkerüv keçirmege ve onı tedaviyletmege talap ete.

– Ondan malümat çabik almaq zor, ayda eki kere cam arasından bir-birine baqaraq, telefon vastasınen körüşmege aqqımız bar. Advokat içün de onen körüşmek zor ola, advokatlarnıñ apislernen körüşüvi içün boş odalar sıq sıq olmay, – dep İrına Danılovıçnıñ babası qoştı.

Bir qaç aydır içtimaiy jurnalist ağır baş acısını çeke, onıñ orta ve içeri qulaq yanğısı ola bilir. Öldüre bilecek baş miy yanğısınıñ peyda oluv yüskek telükesi bar.