Joze Manuel Pintu Teyşeyra: «Biz qırımtatarlarnıñ meseleleri halqara teşkilâtlar, cematçılıq ve Ukraina ükümetinen birlikte çezilecegine ümüt etemiz»

05 Oktâbr 2011

Avropa komissiyası Ukrainadaki Vekâletliginiñ başı Joze Manuel Pintu Teyşeyra Ukraina mustqilliginiñ 20-nci yılında bile qırımtatar halqınıñ bir sıra çezilmegen meseleleri mevcut, dep saya. “Biz qırımtatarlarnıñ meseleleri halqara teşkilâtlar, cematçılıq ve Ukraina ükümetinen birlikte çezilecegine ümüt etemiz”, – dedi Joze Manuel Pintu Teyşeyra Qırımtatar halqı Meclisiniñ oktâbr 5 künü elçiler ve halqara teşkilât vekillerinen Halqara forum keçirbv çerçivesinde ötkerilgen körüşüv bitken soñ.

Cenap Teyşeyra Meclis yolbaşçılarınıñ elçiler ve halqara teşkilât vekillerinen körüşüv er keste büyük meraq doğurıp, iştirakçileri tarafından qızğın muzakere etilgen körüşüvniñ mevzusı ğayet müim olğanını qayd etti. “Milliy azlıqlarnıñ aqlarına dair meseleler Avropa içün esas degerlik dep sayıla. Qırımtatar halqınıñ taqdiri aqqında aytırkenmiz, bu milletniñ onı tarihiy yurtundan vahşiyane quvıp çıqarğan sovet rejiminden zarar körgenini hatırlaymız. Subetdeşlerimizden Ukraina mustaqilliginiñ 20 yılı devamında qırımtatar halqınıñ meselesini öyle de çezilmegenini eşittik”

Avropa komissiyası Ukrainadaki Vekâletliginiñ başı Joze Manuel Pintu Teyşeyra şunı da bildirdi ki, qırımtatar halqı meselesiniñ çezilmesine ait qarar ÖBSE Aliy Komissarı Knut Vollebekniñ ziyaretinden soñ alınır. “Yaqın vaqıtta ÖBSE Aliy Komissarı Knut Vollebek Ukraina ve şu cümleden Qırımnı ziyaret etip, Qırımnıñ yolbaşçıları ve tabiiy ki, qırımtatar halqınıñ vekillerinen de körüşmek maqsadında.”, – dedi eminliknen cenap Teyşeyra.