İyül 20-de Moskva Helsinki gruppasınıñ başı ve esasçısı, belli uquqqoruyıcı, doğma Kezlevli L.Alekseyeva 85 yaşını qayd ete.

20 Iyül 2012

“Tamam 85 yıl evelsi 1927 senesi Siz Qırımnıñ aziz toprağında dünyağa kelgeniñiz siziñ taqdiriñizni qırımtatar halqınıñ taqdirinen bağladı.

SSSR kommunist rejimine qarşı beraber küreş alıp barğan yıllarımızğa nazar taşlap, bütün cesür arqadaşlarımıznı hatırlarkenim qırımtatar halqı içün eñ ağır devirde onıñnen yan-yanaşa qorqubilmez ve sadıq dostları bulunğanı içün Yüce Rabbime şükürler olsun.

Qırımtatar halqınıñ öz aqları içün küreşişnde şahsen iştirak etüviñiz biz içün pek qıymetlidir.

Bu umumhalq küreşinde SSSRdeki uquqqoruv areketi tesis etken barışıq printsiplerge esaslanıp biz eñ müim yeñişni elde ettik – qırımtatar halqı öz Vatanına qaytmaqta!

Sizni 2012 senesi mayısta Qırımda körgenimizden ğayet memnünmiz. Sizni daima doğğan yeriñizde bekleymiz!

Yubiley munasebetinen eñ samimiy hayırlavlarımnı qabul etiñiz. Yüce Rabbimiz Sizge sağlıq, insan ve halqlarnıñ aqları içün küreşte yanıñızda daima sadıq dostlar ve meslekdeşleriñiz bulunmasını tileyim!”, denile Meclis reisi M.Cemilevniñ hayırlavında.