İstanbulda halqara seminar

09 Mart 2011

2011 senesi iyül 9 – 24 künleri İstanbulda “ZÜBEYDE HANIM ÖGRETMENEVI” kompleksiniñ bazasında türk tilli devletler ve cemiyetlerniñ maarif hadimleri içün “Tasilde yañılıqlar ve medeniy özara almaşuv” mevzusında halqara seminar keçirile. Seminar Azerbaycan, Nahiçevan, Qazahstan, Qırğızstan, Turkmenistan, Qırım (Ukraina), Tacikistan, Makedoniya, Gagauziya (Moldova), Ğarbiy Frakiya (Gretsiya), Tatarstan, Başqırtstan, Çuvaşiya, Bösniya ve Gertsegovina, Gürcistan, mesheti- türkler, Albaniya, Mongoliya, Bulğaristan, Özbekistannı qaplap ala.

Seminarnıñ 125 iştirakçisinden 10-ı Qırımdan. Cumhuriyetni idare hadimleri, universitet ve mektep ocaları temsil eteler. Seminarnıñ planında Türkiyede belli professorlar, ilim namzetleriniñ lektsiyalarını diñlemek, tecribe almaşuv ve medeniy programma közde tutula. Qırım delegatsiyasına Qırım Tasil nazirliginiñ qırımtatar tilinde tasil sektorınıñ başı Zarema Suleymanova rehberlik yapa.

Qırımtatar maarif hadimlerini seminarda iş alıp barmağa azırlağan “Maarifçi” birleşmesiniñ reisi Safure Kacametovanıñ aytqanına köre olarnen bir sıra konsultativ toplaşuvlar keçirilip, çıqışlarnıñ mevzuları muzakere etildi, hatıra bahşışları alındı ve çıqış vesiqaları azırlandı.

İyül 8-de Qırım delegatsiyası İstanbulğa uçtı.