İsmail Gasprinskiyniñ icadı – gençler içün örnek

20 Mart 2012

Martnıñ 20 ve 21 künleri belli qırımtatar siyasiy erbabı, mütefekkir ve naşır İsmail Gasprinskiy doğğanınıñ 151 yıllığı şerefine tantanalı tedbirler keçirilmekte. Halqlar, milletler arasında dostluq ve birlik-beraberlikke bizler onıñ sayesinde iriştik.

2012 senesi mart 20 künü Aqmescitte İsmail Gasprinskiy adına cumhuriyet qırımtatar kütüphanesinde “İsmail Gasprinskiyniñ dünyası” edebiy oquvlar açılıp, Avstraliyada yaşağan semetdeşimiz Refat Şakir-Aliyevniñ “Ocanıñ izinden sekiz adım” serlevalı kitabınıñ taqdimi ötkerildi. Tedbirni Qırımtatar halqı Meclisiniñ Maarif ve medeniyet idaresi, İ. Gasprinskiy kütüphanesi ve “Maarifçi” qırımtatar tasil hadimleri birleşmesi teşkilâtlandırdılar.

Edebiy oquvnı selâmlav sözünen Qırımtatar halqı Meclisiniñ Maarif ve medeniyet idaresiniñ başı, “Maarifçi” qırımtatar tasil hadimleri birleşmesiniñ reisi Safure Kacametova ve Qırım Medeniyet nazirligi medeniyet ve milliy medeniy siyaset bölüginiñ reberi Pavel İbadlayev çıqışta bulundılar.

“İ.Gasprinskiy ulu insan edi, o, yalıñız qırımtatarlar içün degil de, bütün türkiy halqlar içün pek çoq işler yaptı, – dedi P. İbadlayev. – Onıñ faaliyeti sayğı ve temennağa lâyıqtır. Onıñ adını kütüphane, soqaqlarğa bereler, oña eykel ve abideler qoyalar”.

“Qırımtatar halqı Meclisiniñ adından men epiñizni Navrez bayramı ile hayırlayım, – dep başladı öz çıqışını Safure Kacametova. – Aynı zamanda men sizni daa bir bayramnen – İsmail Gasprinskiy doğğanınıñ 161 yıllığınen de tebrik etmek isteyim. Onıñ doğğan künü, şübesiz, qırımtatar halqı tarihında ulu bir kün oldı”.

Edebiy oquvlar çerçivesinde “Tasil” oquv-usuliy mecmuası çıqqanınıñ 10 yıllığı da qayd etilip, Safure Kacametova mecmuanıñ tarihı ve esas mevzuları aqqında ikâye etti.

Tedbirniñ soñunda İsmail Gasprinskiyniñ fikirlerinen tanış etken “Ocanıñ izinden sekiz adım” kitabınıñ müellifi Refat Şakir-Aliyevnen skayp vastasınen subetleşildi.

Şunı eminliknen qayd etmeli ki, İ. Gasprinskiy şahsiyetine ve icadına meraq ep artmaqta. Onıñ icadı gençlerni terbiyelevde örnektir.