İslâm Terekte narazılar «Prosili pomnit» kitabını yasaq etmek boyunca çare körülmesini talap ettiler

12 Avgust 2013

2013 senesi avgust 12 künü İslâm Terek rayonında “Kniga Pamâti Vostoçnogo Krıma “Prosili pomnit” Şarqiy Qırım hatıra kitabı “Unutmamaqnı rica ettiler” serlevalı davalı kitapqa qarşı ötkerilgen Bütünqırım miting iştirakçileri neşir müellifi Vladimir Şirşovnı İslâm Terek rayonınıñ fahriy sakini unvanından mahrum etip, İslâm Terek rayon devlet memuriyetiniñ başı Öleg Gördeyevni istifağa çıqarmaqnı talap ettiler. Bu aqta QHA inform agentligi haber ete.

İslâm Terek rayon devlet memuriyeti ögünde keçirilgen mitingde Qırımnıñ çeşit yerlerinden kelgen biñge yaqın adam iştirak etti. Mitingge Meclis reisiniñ birinci muavini, “Qurultay-Ruh deputat fraktsiyasınıñ başı Refat Çubarov, Meclis Kâtibiyetiniñ başı Zair Smedlâyev, İslâm-Terek regional meclis reisi Ekrem Abdulvatov da keldiler.

Narazılar İslâm Terek rayon devlet memuriyetiniñ başı Öleg Gördeyevni istifağa çıqarmaqnı talap etken qararnı qabul etip, “Unutmamaqnı rica ettiler” kitabını yasaq etmek boyunca çare körülmesini yani tiraj yaqalanması, yoq etilmesi aqqında mahkemege ait ariza yollanılması meselesini qoydılar. Miting iştirakçileri neşir müellifi Vladimir Şirşovnı İslâm Terek rayonınıñ fahriy sakini unvanından mahrum etmek talabını da ögge sürdiler.

“İslâm Terek rayon yolbaşçılarını aqılsız insanlar, dep sayam, çünki bu kitapnıñ neşir etilmesine devlet bücetinden 15,5 biñ grivnâ ayırmaq qararını alğanlar. Bundan da ğayrı köy şuralarınıñ reislerine muracaatta bulunıp, bu kitapnıñ yazılmasına maddiy destek köstermekni rica etkenler de, kitapnıñ ne mündericesinen tanış olğanlar, ne de kitapqa obyektiv qıymet kesecek taqrizçini celp etkenler”, – dedi Meclis reisiniñ birinci muavini Refat Çubarov

Şunı hatırlatmalı ki, İslâm Terek rayonında Qırımnıñ cumhuriyet bücetinden ayırılğan sermiya esabına milletler arasında qavğa-dava çıqaracaq, milliy, ırqiy, diniy nefret qozğayabilecek “Kniga Pamâti Vostoçnogo Krıma “Prosili pomnit” (Şarqiy Qırım hatıra kitabı “Unutmañız dediler” serlevalı kitap çıqarıldı. Kitapnıñ müellifleri ve tertipçileri qarı-qoca Vladimir ve Mariya Şirşovlar.

Kitap müellifleriniñ fikrince kitap derslik statusını alıp, İslâm Terek rayonınıñ mektep ve kütüphanelerinde tarqatılması kerek edi.

Qırımtatar halqına nisbeten sahte ve aqaretleyici fikirler olğan neşirni finansirlev ve tarqatuvda İslâm Terek rayonı yerli idare ve icra organları ve vazifedar şahıslar iştirak etmesine qarşı miting iştirakçileriniñ
qararı

2013 senesi iyül 25 künü saat 13.30 İslâm Terek rayon devlet memuriyetiniñ muşavereler salonında Vladimir ve Mariya Şirşovlarnıñ “Şarqiy Qırım hatıra kitabı “Unutmamaqnı rica ettiler” serlevalı kitapnıñ 1-nci cıltınıñ taqdimi olacaq edi. Kitapqa kiriş sözüni İslâm Terek rayon devlet memuriyetiniñ reisi Öleg Gördeyev yazğan.

Rayon memuriyetiniñ resmiy saytında tedbir aqqında berilgen ilânda Öleg Gördeyev ve İslâm Terek rayon şurasınıñ reisi Mihail İvanovnıñ da iştiraki közde tutula edi. Rayon meclis reisi kitapnıñ mündericesinen taqdimge bir kün qalğanda tanış ola. Neşirniñ “Qırımtatar meselesi” adlı ayrıca bölüginde qırımtatarlar aqqında SSSR devrinde yazılğan maqalelernen bir sırada müelliflerniñ 1944 senesi mayıs 18-de kommunist rejimi tarafından yapılğan cinaiy sürgünlikni aqlamağa tırışqan sahte uydurmaları da yer alğan.

Bundan da ğayrı kitap müellifleri çoqtan-çoq endi isbat etilgen faktlarğa baqmadan meşur razvedkacı Alime Abdennanovanıñ hatırasını da aqaret eteler. Albu ki arbiy yeminine sadıq qalıp, iç bir arqadaşını satmağan Alime Abdennanovanı faşistler qıynap öldürdiler. Onıñ elâkından 69 yıl keçken soñ yañı yetişip çıqqan tarihçı Şirşovlar onı sanki duşman tarafına keçip, satqınlıqta suçlayaraq endi qaraman aqqında –hatıranı bile öldürmege tırışalar.

Qırımtatar cemaatçılığınıñ açıqtan-açıq narazılığı kitap tanıtılmasına yol bermedi. Amma kitap müellifleri rayon devlet memuriyeti ve cemaatçılıq vekilleriniñ bu vaziyetten çıqmaq yollarını araştıruv tekliflerini red eterek çeşit “tögerek” massa subetlerinde iftira tarqatmaqnı devam eteler. Şirşovlarnıñ böyle areketlerine biz qırımtatarlarğa nisbeten añlı şekilde nefret qozğamaqtır dep qıymet kesemiz.

Şunı da ayrıca qayd etmeli ki, 1922 senesi mayıs 18 künü insaniyetke nisbeten yapılğan cinayetlikni aqlağan 1200 nushalı kitapnıñ neşirge azırlanması ve basılması İslâm Terek rayonı bücetinden ayırılğan 15 500 grivnâ, bunıñ kibi de bir sıra köy şuralarınıñ destegi esabına mümkün oldı. Rayon şurasınıñ deputatları ve devlet memuriyetiniñ yolbaşçıları ise neşirniñ ne planı, ne müellifler erkânını tasdiqlamaqnı, ilmiy taqriz almaq kerekligini tüşünmegenler.

Böyleliknen, milletlerara, dinlerara qavğa-davanı qozğağan kitap müellifleriniñ, böyle kitapnı neşir etmek içün devlet sermiyalarını sarf etken vazifedar şahıslarnıñ areketleri Ukraina Cinaiy Kodeksiniñ 161-nci maddesine köre mesülietke çekilmeliler. Bizim fikrimizce, Şirşovlar ve İslâm Terek rayon memurları yapqan areketlerniñ baş maqsadı çeşit millet insanları arasına şına qaqmaq, işançsızlıq, şübe urluqlarını saçmaqtır.

Biz, Qırımtatar halqına nisbeten sahte ve aqaretleyici fikirler olğan neşirni finansirlev ve tarqatuvda İslâm Terek rayonı yerli idare ve icra organları ve vazifedar şahıslar iştirak etmesine qarşı mitingniñ iştirakçileri akimiyet ve uquqqoruv organlarından talap etemiz:



1. Qısqa müddette Şirşovlar ve İslâm Terek rayon şurası memurları yapqan areketleri boyunca Ukraina Cinaiy Kodeksi 161-nci maddesi 1-nci qısmına binaen taqiqat keçirilsin.

2. “Unutmamaqnı rica ettiler” kitapnıñ bütün tirajı yaqalanıp, onıñ yoq etilmesi aqqında mahkemege ait arizalar yollanılsın.

3. Gördeyev Öleg Konstantinoviç İslâm Terek rayon devlet memuriyetiniñ reisi vazifesinden boşatılsın.

4. İslâm Terek rayon ve köy şuraları bücetinden ketken masraflarnı ödemek boyunca qanunğa köre çareler körülsin.

5. İslâm Terek rayon şurasına “Ukraina Halq Areketi” partiyasından saylanğan deputatlarğa Şirşov Vladimir Födoroviçni İslâm Terek rayonınıñ fahriy sakini unvanından mahrum etmek teşebbüsinen çıqmaq avale etilsin.
 

Miting iştirakçileri tarafından qabul etildi

İslâm Terek (Kirovskoye) qasabası.

2013 senesi avgust 12