İslâm İşbirligi Teşkilâtı (İİT) qırımtatarlarnıñ aqlarını ürmet etmege çağırdı

28 Mart 2014

Ukraina ve Qırımda yüz bergen soñki vaqialar munasebetinen İİT yarımadanıñ musulman qırımtatar cemiyetiniñ telükesizligi ve eyiallılığını qayğırğanını bildirdi.

XX asırda tuvğan toprağından quvulğan qırımtatarlarnıñ faciası tekrarlanmamalı, denile İİT mart 25-te qabul etken beyanatında

“Olarnıñ vatandaşlıq aqları, diniy ve medeniy variyeti, mülkü qorçalanılması İİT içün pek müimdir”, – denile beyanatta.

İslâm İşbirligi Teşkilâtı XXI asırda “yapıcı dialog ve qomşulıq munasebetleri halqara cemiyet azaları içün adet olmaq kerek”liginde emindir.

Hatırlatamız ki, Meclis musulman devletlerni birleştirgen eñ büyük teşkilât olğan İİTni Ukrainada iñqiraznı barışıq yolunen çezmek içün öz itibarını işke qoymağa çağırğan edi.