İşğalciler, siyasiy mabüs Dilâver Ğafarovnı ceza izolâtorına oturttılar

12 Aprel 2023

“Noman Çelebicihan adına qırımtatar batalyonı” aqqında davağa mücibi 10 senege maküm etilgen Dilâver Ğafarovnı rf müstemlekesindeki ceza izolâtorına oturttılar.

Siyasiy mabüsniñ apayı Dilâra Ğafarovğa atıf eterek, “Qırım birdemligi” içtimaiy birleşmesi bu aqqında haber berdi.

Onıñ sözlerine köre, şu anda RFnıñ topraqlarında Stavropol krayındaki Koçubeyevskoye köyüniñ 1. tüzetüv müstemlekesinde Ukraina vatandaşı buluna. Anda oña berilgen müddetniñ deyerli yarısını keçirdi.

Apayı, siyasiy mabüsni ceza izolâtorına oturttuv sebebini bilmey.

Qırımtatar Dilâver Ğafarov Ramadan ayında oraza tuta. ŞİZOda memuriyetniñ qayd etkeni zamanlardan ğayrı aşamaq ve suv içmek yasaqtır.

2018 senesi ekim ayınıñ 30-ında Kirov rayonınıñ Çotı (Jemçujına) köyündeki qırımtatar Dilâver Ğafarovnıñ evi tintildi. Bundan soñ o tutuldı ve rf CQniñ 208. maddesiniñ 1. qısmına (qanunsız silâlı birleşmede iştirak) mücibi sanki cinayet yapqanı içün oña qarşı şübe bildirildi.

2019 senesi arman ayınıñ 28-inde Ğafarov 10 senege maküm etildi.