İşğalciler “Qırım” gazetasınıñ 300 biñ rublelik para cezasını lâğu etmediler

16 Iyül 2024

_{Foto: Qırım birdeligi}

Kiyev rayon makemesi “Qırım” gazetasınıñ şikâyet arizasını red etip, “Rusiye Silâlı quvetlerini itibarını tüşürgeni” içün 300 biñ rublelik para cezasını belgiledi.

“Qırım birdemligine” uquqçı Lilâ Gemeci bunı bildirdi, dep Suspilne Qırım haber berdi.

O hatırlattı ki, işğalli akimiyet tarafından protokol içün sebep, gazetanıñ saytında derc etilgen haber oldı. Umumen muarririyetniñ hadimlerine qarşı dört memuriy protokol tizildi.

Gemci, Ekstremizmnen küreş merkeziniñ operativcisi V. Korenivskıy “Qırım” gazetasınıñ uquqçısına “Rusiye silâlı quvetleriniñ itibardan tüşürgeni” ve gazetanıñ tesisçisi ve müdiri Seyran İbrahimovğa qarşı “añlı tarzda yañlış malümat tarqatqanı” içün eki protokol tizdi. İşğalciler gazetanıñ baş muarriri Bekir Mamutovğa qarşı da protokol tizdi.

Qırımtatar Milliy Qurultayınıñ azası Ali Özenbaşnıñ yayınında qırımlılar ne içün Rusiyeniñ Ukraina toprağında keçirilgen mahsus operatsiyasında iştirak etmemek kerekligi aqqında aytıla. Lilâ Gemeci bildirdi ki, bu maqalesi içün gazetke berilgen memuriy protokol makeme ögünde baqılmadı. Aqmescitniñ Kiyev rayon makemesiniñ yerine dava Aqmescit rayon makemesinde baqılmaq kerek edi.

Uquq qorçalayıcı qayd etti ki, protokol tizilgen soñ oña deñişmeler kirsetildi, bunıñ neticesinde memuriy dava tertibi bozuldı.

Bundan da ğayrı, imayeci taraf, Ali Özenbaşnıñ maqalesiniñ tercimesi yañlış olğanını qayd etti. İmayeci taraf şikâyet arizasına qırımtatar sözleriniñ “çoq sıñırlı” olğan onlayn luğatlarından tercimelerini ilâve etti, dep qayd ete uquq qorçalayıcı. Onıñ aytqanına köre, terciman yañlış tercime içün mesüliyet aqqında haberdar etilmedi.

Gemci, gazetanıñ baş muarriri Bekir Mamutovnıñ davasında aynı hatalar olğanını qoştı. O, makemeniñ protokolnı yañlışlıqlarnı tüzetmek içün qaytarğanını bildirdi. Lâkin protokolnı yañıdan tizmege başlağanda, tercimanğa Rusiye Federatsiyasınıñ Memuriy bozumalar qanunnamesiniñ 17.9. maddesine köre aqları ve vazifeleri aqqında haber etildi, mında bilerek yañlış tercime içün aqlar ve vazifeler aqqında aytılmay.

Gemeci qayd etti ki, eki davanıñ tercimesi de qanun talaplarına uymay, ve davalar, cinayet terkibi olmağanından sebep, toqtatılmalı. O, kassatsiya şikâyetini bermege planlaştıra. İşğal etilgen Kiyev rayon makemesiniñ qararı küç alacaq, ve gazetanıñ 300 biñ rublelik para cezasını ödemek içün 60 künü bar.

“Bu miqdar büyüktir ve milliy kütleviy haber vastaları içün pek büyüktir. Onıñ içün tek gazeta abunecileri degil de, halqımıznıñ bütün vekilleri bu para cezasını ödemege yardım etmek içün birleşmeliler”, — dep uquq qorçalayıcı qayd etti.

Hatırlatamız ki, Kiyev rayon makemesi 2024 senesi bozarğan aynıñ 7-nde “Qırım” muarririyetini memuriy uquq bozuluvında qabaatlı tanıdı. Rusiye Federatsiyasınıñ Memuriy bozmalar qanunnamesiniñ 20.3.3. maddesiniñ 1. qısmına binaen 300 000 rublelik para cezasını tayin etti.