İnsaniyetsiz şartlar sebebinden siyasiy mabüsler açlıq çekmege qarar bereler

05 Aprel 2023

Açlıq – şu cümleden Qırımda siyasiy maqsatlı taqiplerniñ qurbanlarınıñ çekkenleri cinayetlerge diqqat etmek içün tek usuldır. Qırım.Aqiqatnıñ canlı yayınında QırımSOSnıñ İdaresiniñ Başı Oleksiy Tilnenko bunı ayttı.

– Bu tür açlıq vaqiaları sıq sıq olalar. Yazıq ki, bizim siyasiy mabüslerimiz, SİZOda ve başqa esaret yerlerinde bulunğan ukrainalılar içün bu – apishanelerde ve SİZOda çekkenleri işkenceler, azaplar kibi cinayetlerge diqqat celp etmek içün tek usuldır, – dep Oleksiy Tilnenko ayttı.

Saban ayınıñ 21-inde qanunsız olaraq epis etilgen içtimaiy jurnalist İrına Danılovıç quru açlıq ilân etti. Bu tür qararnıñ sebebi, Aqmescit şeerindeki SİZOda tedaviylev ve tibbiy yardımnıñ bermemesidir. Mektübinde Danılovıç qayd etti ki, “ya oña tedaviylev bermege ya da ölümime qadar” açlıq çekmege devam etecek.

Siyasiy maqsatlı taqiplerniñ qurbanlarınıñ açlıq başlamalarınıñ eñ sıq sebebi – kerekli tibbiy yardım ya da tedaviylev bermeme ola. Tibbiy yardımğa irişimniñ bar olmaması, bazı vaqialarda insaniyetsizlik ve azaplar olaraq tanına bilir. Bundan ğayrı, açlıq çekmege qarar bergen mabüslerniñ mecburiy açlığı, işkenceler olaraq tanına, dep Tilnenko qayd etti.

Esaret yerlerinde kerekli tibbiy yardımnıñ bar olmaması, siyasiy mabüslerniñ ayatları içün telükedir. 2023 senesi o, Qırımda siyasiy maqsatlı taqiplerniñ eki qurbasınıñ ölüminiñ sebebi oldı.