«İnanam ki, ukrainler ve qırımtatarlarnıñ bir ve munasip kelecegi bar», – dedi «NaUkraina – Naroşa dnaya samooborona» fraktsiyasınıñ başı Nikolay Martınenko

19 Mayıs 2012

2012 senesi mayıs 18-de Bütünqırım matem mitinginde Ukraina halq deputatı, “Naşa Ukraina – Narodnaya samooborona” fraktsiyasınıñ başı Nikolay Martınenko çıqışta bulundı.

N.Martınenko “Naşa Ukraїna-Narodna Samooborona” fraktsiyası azalarınıñ adından bütün qırımtatarlarına göñüldeşlik bildirdi. “Bu facia er bir qırımtatar ailesine toqundı”, – dedi o. – Stalinniñ totalitar rejimi aqibetinde yüz biñlernen günasız-suçsız insanlar elâk oldı. Bugün Ukrainanıñ millionlarnen vatandaşı qırımtatarnen beraberdirler”.

Nikolay Martıneko, matem mitingi iştirakçilerine hıtap eterken, ukrain ve qırımtatar halqlarını bir felâket birleştirgenini qayd etti. Olarnıñ
ekisi de öz soyqırımını yaşadı: qırımtatarlar sürgünlikni, ukrainler ise açlıqnı. “Teessüf ki, bugünki akimiyet siziñ aqlarıñıznı tiklemek içün iç bir şey yapmağa istemey, aksine olarnı aqsımlay, – devam etti “Naşa Ukraina – Narodnaya samooborona” fraktsiyasınıñ başı. Parlamentteki çoqluq Qırımtatar halqı Meclisiniñ reisi, bizim fraktsiyamıznıñ azası Mustafa Cemilev bergen qanun leyhasını baqmadı.

Belli ki, leyha Ukrainanıñ milliy mensüpligi boyunca sürgün etilgen vatandaşlarınıñ aqlarını tiklemekni közde tutqan edi. Em de degil tek qırımtatarlarnıñ, belki de diger halqlar vekilleriniñ de aqlarını”. Öz çıqışında Martınenko şunı da qayd etti ki, mayıs 16 künü parlament minberinden NKVDnıñ devamcıları olğan kommunistler tarafından qırımtatarlar adına yañğırağan qabaatlavlarnı hatırlamaqtan bile nevretlene. “Barsın, bu, zemaneviy stalincilerniñ vicdanına qalsın. Ebet, eger bu vicdan olarda olsa. Bu olarnıñ eñ sevgen usulı – yani ağırmağan başqa yavluq bağlaylar”, – dedi ukrain siyasetçisi.

“Naşa Ukraina – Narodnaya samooborona” fraktsiyasınıñ başı N.Martınenko, yañı parlamentteki demokratik çoqluq milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında qanun leyhasını ep bir qabul eter, dep işandırdı ve ukrainler ve qırımtatarlarnıñ bir ve munasip kelecegi barlığını da qayd etti.

Malümat içün:2012 senesi mayıs 18-de Qırımda Qırımtatar halqı öz tarihiy Vatanı Qırımdan sürgün etilgeniniñ 68 yıllığına bağışlanğan Bütünqırım matem mitingi olıp, onda 30 biñden ziyade insan iştirak etti