İlver Ametov: Kollektsiya toplamaq ğayesi babamnıñ bardağından başlandı

22 Dekabr 2013

2013 senesi dekabr 22 künü Meclis yolbaşçılarınıñ Sudaq regionında toplaşuvı bitken soñ Meclis reisi Refat Çubarov ve Meclisniñ idare ve hızmet reberleri Sudaq regional meclis yolbaşçısınıñ daveti ile qırımtatar halqı tarihınıñ şahsiy müzeyini ziyaret ettiler.

Onı İlver Ametov Asret soqağında öz evinde açtı Qırımtatar halqı milliy areketi iştirakçilerinden biri İlver Ametov eki yıl evelsi semetdeşleri ve Sudaq musafirleri içün qırımtatar halqı ve onıñ milliy areketi aqqında tarif etken nadir, unikal eşyalardan ibaret hususiy kollektsiyasından ibaret müzeyini açmaq qararını aldı. Bu eksponatlarnı İlver Ametov çoq yıllar devamında toplap, bu işnni bugün de devam etmekte.

“Er şey bardaqtan başlandı. Onı babam 1944 senesi mayıs 18 gecesi boğdaynen toldurğan, – dep ikâye ete İlver Ametov müzeyge kelgenlerge. – Bardaqnıñ içindeki boğday yolda ve sürgünlikniñ birinci künlerinde qorantamıznıñ canını saqlap qaldı. 50 yıldan soñ bu bardaq ailemiznen beraber kene babamnıñ doğğan yerine qaytıp keldi.

Asılında, aynı şu bardaq kollektsiyamnıñ ilk eksponatı oldı”. İlver ağanıñ kollektsiyasında bir çoq original, şu cümleden orta asırlarğa ait eşyalarnı körmek mümkün. Mında milliy silâlar, çölmekçilik mahsulatı, ilvanlar, foto ve turmuş eşyaları ve atta orta asır askeri urbasınıñ kopiyası da bar.

“Müzeyde halqımıznıñ Vatanğa qaytmasında, milliy areketimizde “yardımcılarımız” olğan eşyalar da bar, – ikâye ete İlver Ametov ve milliy areket arhivine kirgen çoqtan-çoq müim vesiqalarnı basqan, çoqlaştırğan maşinkanı köstere. Müzey musafirleri qırımtatar halqı hatırasınıñ bir qısmı olacaq qıymetli kollektsiyanı toplağan İlver Ametovğa ayret ve minnetdarlıq sözlerini bildirdiler.

“Men müzeyime kelgen ve Qırım tamır halqınıñ tarihınen tanış olmağa istegen er bir musafirge sevinem, – dey İlver Ametov.

Sudaq regional meclis reisi halqınıñ yalıñız siyasiy-içtimaiy ömürinde faaliyet kösterüvnen sıñırlanmadan öz eviniñ qarşısında balalar içün oyun meydanını da qurdı.