İçtimaiy jurnalist Remzi Bekirov rusiyege etap etildi

16 Iyün 2023

İçtimaiy jurnalist Remzi Bekirov Krasnoyarskqa etap etildi. Apayı Halidege atıf eterek Qırım.Aqiqat bunı yazdı.

Aqayından alğanı mektüpniñ qısmını yayınladı:

– Şimdi Çelâbinsk şeerindeki SİZOda bulunam. Bu künleri Krasnoyarsk şeerine doğru yolum devam etecek, anda yapmağanım bir cinayet içün ceza çekecem, – dep Bekirov haber berdi.

Onıñ sözlerine köre, mayıs ayınıñ 28-inde Novoçerkasktaki SİZOdan Voronej tarafına çıqtı.

– Yolda olğanlar filmde körgenlerime oşadı: silâlı konvoy, sert bir ses, avlağan köpekler, bizni qırçmanen bağlağan zıncır, nefes almağa çaresi olmağan penceresiz Stolıpin vagonı ve mabüslerniñ aqsızlığı. Tren, avtozak kibi, sıcaq ve avasız edi. Vagonımız rıqma-rıq tolu edi, – dep Bekirov haber berdi.

2019 senesi saban ayında Qırımda us quvetçileri, qırımtatar faalcileriniñ evlerini tinttiler. Şu cümleden, “Qırım birdemligi” içtimaiy birleşmesiniñ vekilleriniñ evlerini. Umumen 24 insan tutuldı, olar aralarında içtimaiy jurnalistler Osman Arifmemetov, Rustem Şeyhaliev, Remzi Bekirov. 2019 senesi saban ayınıñ 27-si ve 28-inde Aqmescit şeerinde rus makemesi bütün tutulğan insanlarnı epis etildi.