“Hizb ut-Tahrir” davasında maküm etilgen Arsen Cepparov 7 senelik epislikten soñ azat etildi

17 Aprel 2023

Başqırtistanda “Hizb ut-Tahrir” davasında maküm etilgen qırımtatar Arsen Cepparov epishaneden çıqtı. Qırım.Aqiqat bunı yazdı.

Çiçek ayınıñ 17-sinde Cepparovnıñ 7 sene devam etken epislik müddeti soñuna keldi. Salavatta müstemlekeniñ qapısı yanında advokatı Edem Semedlayev onı körüşti.

– Bu kün endi keldi – men azat oldım. Qapıdan çıqqan soñ qardaşlarımznı körmege pek memnün edim. 7 senelik duyğularımnı añlatamam. Bu duyğu pek eyecanlı, pek raatsızlanamz. Şimdi de başqalarınıñ azat olacaqlarını bekleyik, – dep Cepparov tefsir etti.

Advokat Edem Semedlayev “Qırım birdemligi”ne Qırımda onı ozğaracağını haber berdi.

Uquq qorçalayıcılar qayd eteler ki, epislik şartlarında Cepparovnıñ sağlığı yaramaylaştı, 2022 senesi ekim ayından berli o er vaqıt ceza izolâtorında buluna edi.

2016 senesi çiçek ayınıñ 18-inde Cepparovnı tuttılar. “Qırım birdemligi” qayd ete ki, epislikten bir ay evel işine TFHniñ işçileri, işdeşlik yapması içün, keldiler. Cepparov, başqa insanlarnı çaqmalı edi. Red etse edi, oña qarşı cinaiy dava açmağa qorqutar ediler.

Cepparov red etti ve işken çıqarıldı. 20216 senesi çiçek ayınıñ 18-inde Aluşta rayonındaki Qızıltaş (Krasnokamyanka) köyündeki evi tinttiler. Bunan soñ Cepparovnıñ davasını keçenlerde tutulğan Refat Alimov, Muslim Aliev, Enver Bekirov ve Vadım Siruknıñ cinaiy davalarınen birleştirdiler. Uquq qorçalayıcılar onı “Hizb ut-Tahrir” davasındaki “yalta gruppası” olaraq adlandırdılar.

2019 senesi boş aynıñ 12-sinde Cenübiy bölge arbiy makemesi (Rostov-na-Donu) Cepparovnı 7 senege maküm etti.