Hıdırlez bayramı 2013 senesi mayıs 6 künü «Şeherizada» eglence merkezi yanında keçirilecek

09 April 2013

Aprel 9 künü Qırımtatar halqı Meclisi reisiniñ birinci muavini Refat Çubarov, Bağçasaray regional meclis reisi Ahtem Çiygoz ve Hıdırlez bayramını azırlav ve keçirüv boyunca teşkiliy komitet reisi Emine Avamileva “Qırımtatar milliy bayramı Hıdırlezni keçirüv” mevzusında matbuat konferentsiyasını keçirdiler.

Refat Çubarovnıñ bildirgenine köre er yılı olğanı kibi Bütünqırım Hıdırlez bayramı 2013 senesi mayıs 6 künü “Şeherizada” eglence merkezi yanında keçirilecek.

Meclis tarafından tesis etilgen Teşkiliy komitetke Emine Avamileva reislik yapa, onıñ erkânına ise epsi regional meclislerniñ reisleri kirsetildi.

Refat Çubarov Bütün Qırım seviyesinde bir qırımtatar milliy bayramını keçirmek teşebbüsinen 2011 senesi o zamanda Ukraina Prezidentiniñ Qırımdaki temsilcisi olğan Vladimir Yatsuba çıqqanını hatırlattı. “2012 senesi biz bu teşebbüsni qırımtatar ziyalıları, dindarlar ve cemaat teşkilâtlarınen muzakere etken ve añlaşqan edik, – dedi Qırımtatar halqı Meclisi reisiniñ birinci muavini Refat Çubarov – aprel 18 künü ise Qırım Nazirler şurasınıñ “Qırımtatar milliy bayramı Hıdırlez bayramını azırlav ve keçirüv aqqında” qarar alınğan edi. Belli ki, eki yıldan berli bayram Aqmescit –Bağçasaray yolunıñ 25-nci kilometrinde yerleşken “Şeherizada” eglence merkezi yanındaki alanda keçirile edi.

Bayramda bulunğan Qırım baş naziri Anatoliy Mogilöv Qırım cemaatına Hıdırlez keçirilgen meydanda milliy bayramlarnı keçirmek içün kerek şaraitlerni yaratmağa söz berdi, lâkin netice şimdilik körünmey.

R.Çubarovnıñ aytqanlarına köre bu yılı Qırım Nazirler Şurası bayramnıñ künü ve yerini deñiştirmek qararını alıp, bayram tedbirlerini Qırımnıñ bir sıra rayonlarında keçirmekni planlaştıra. R. Çubarovnıñ fikrince Nazirler Şurasınıñ bayramğa qatılmağa istemegenine siyasiy bir çıqış olaraq qıymet kesmek mümkün.

“Biz başlanğıçnı devam etmek niyetindemiz ve Hıdırlezni keçken yıllardakisi kibi o yerde qayd etmek qararındamız, – dedi Refat Çubarov. – Şunı da esapqa almalı ki, Bağçasaray rayon devlet memuriyeti Qırımtatar milliy bayramı Hıdırlez bayramını “Şeherizada” eglence merkezi yanındaki alanda keçirüv aqqında” qarar aldı. Qırımtatar halqınıñ Meclisi ise bu tedbirniñ Bütünqırım miqyasında olmasını teminlegen tedbirler planını işledi”.

Öz nevbetinde Teşkiliy komitet reisi E. Avamileva bayramğa azırlıq aqqında tafsilâtlı malümat berdi. “Hıdırlez bayramı programması çerçivesinde milliy folklor ansamblleri, halq sanatı eserleriniñ sergisi, milliy küreş, at qoşuları ve bunıñ kibi de balalar içün bir çoq eglenceler, qalaqay tığırtuv tedbirleri olacaq”, – dedi E. Avamileva. Onıñ bildirgenine köre bayramda iştirak etmek istegi aqqında arizanen Donetsk vilâyetiniñ urumlar cemiyeti muracaat etken. Belli ki, qalaqaynıñ nasıl tüşkeninden şu yılnıñ nasıl olacağını bilmek mümkün.

Emine Avamileva bayram iştirakçileri içün bedava içimlik suvu berilip, spirtli içimlikler satılması yasaqlanacağını da ayttı. Tek meyva suvları satılacaq. Sponsorlar meydanda çadırlarnı qoymağa söz bergenler. Sinoptiklerniñ tahminlerine köre mayıs 6 künü açıq ve küneşli ava olması beklenile. “2013 senesiniñ bayramı em musafirler, em tedbirler sayısı ceetinden kölemlice olacaq”, dedi Emine Avamileva.

Bağçasaray regional meclis reisi Ahtem Çiygoz dedi ki, çoqbiñ adamlıq bayramlar keçirüvde Bağçasaray endi bayağı zengin tecribege maliktir.

Bu sene bayram tek Qırımdan degil de, Ukrainanıñ başqa regionlarında da musafirlerni birleştirir. Onıñ bildirgenine köre bütün regional meclislerniñ reisleri Hıdırlez bayramında iştirak etmek istegini beyan ettiler.

Malümat içün; “Hıdırlez” bayramı quralay ayınıñ birinci cuma künü qayd etile. Bayramnıñ adı eki aziz Hıdır ve İlyasnıñ adlarından ibarettir. Efsanege köre bu eki azizniñ birisi Yerni sağdan, digeri soldan dolanıp, insanlarğa yardım eteler. Bayram bol bereket almaq niyetinde bir sıra tedbirlernen keçirilgen. Bayram şeñligi adeti üzre suv yanında olıp, mıtlaqa bayırdan qalaqay tığırtılğan ve soñunda Horan tepilgen.