Hıdırlez-2013 bütün Qırım ve onıñ tışından kelgen 35 biñ insannı topladı

07 May 2013

2013 senesi mayıs 6 künü Aqmescit – Bağçasaray yolunıñ 25-nci kilometrinde “Şeherezada” medeniy – eglence merkeziniñ keniş meydanında Qırımtatar halqı Meclisi ve Bagçasaray rayon devlet memuriyetiniñ qoltutuvında qırımtatar milliy Hıdırlez bayramı şeñ ve tantanalı sürette keçirildi.

Bütünqırım bayramına Qırımnıñ bir çoq regionlarından ve Ukrainanıñ .şeerlerinden musafirler keldi. Er yerde qırımtatar milliy urbalarnı, eski adetlerimizge köre donatılğan köşelerni körmek ve qoqulı qave içmek mümkün edi. Bayramda halq sanatı işleri satıldı, küreş, şahmat, şaşka ve armresling boyunca yarışları keçirildi, at qoşuları oldı. Qırımtatar milliy yemek ustaları ise lezetli aşlarnen sıyladılar.

Büyük sanada “Cemile”, “Güldeste”, “Aqyar” bala ansamblleri, “İlham” aveskâr ansambli, “Bahçisaray” çalğı-vokal taqımı, “Haytarma” ve diger ansambller çıqışta bulundılar.

Qırımtatarlarnıñ urf-adetleri boyunca bayramnıñ başında meydanda bulunğanlar Qırım musulmanlarınıñ müftisi acı Emirali Ablayev ile birlikte dua oqup, Yüce Rabbige şükürler ayttı ve Qırımnıñ ilerilemesi içün yalvardılar.

Bağçasaray rayon devlet memuriyetiniñ reisi İlmiy Ümerov bayramnı teşkil etmege yardımda bulunğanlarnıñ episine teşekkürler bildirip, musafirlerge bayramnı şeñ keçirmekni tiledi. Bundan soñ kökke barışıqlıq ve bolluq temsili olğan 100 gögercin uçurıldı.

“Aziz semetdeşler ve dostlar! Eki aftadan soñ mayıs 18 künü Qırımda qırımtatar halqı tarihında eñ büyük facia – sürgünlikniñ 69 yıllığına bağışlanğan matem tedbirleri keçirilecek, – dep başladı öz çıqışını Meclis reisi Mustafa Cemilev. – O künü Qırımnıñ bütün yerlerinde mitingler olacaq, eñ büyügi – Bütünqırım matem mitingi Aqmescitniñ merkeziy meydanında ötkerilecek.

Bizim borcumız – birligimiz ve irademizni kösterip, qırımtatar halqı soyqırımı qurbanlarınıñ hatırasını añmaq, haqlarımıznıñ tiklenilmesini talap etmektir. Lâkin bugün merhamet ve uyanuv temsili olğan Hıdırlez bayramıdır. Hıdırleznıñ tamırları halqımıznıñ qadimiy tarihına barıp toquna,asırlar devamında bu kün birlik ve dostluq bayramı olaraq qayd etilip kelindi. Bunı duşmanlarımız da añlaylar ve şunıñ içün de halqımıznı parçalamaq niyetindeler. Cumhuriyet akimiyeti bayramnı mayıs 6-da keçirmege istemeyip, başqa künge keçirgeni bunıñ isbatıdır”

Meclis reisi Mustafa Cemilev bayram iştirakçilerini samimiy hayırlap, er bir ailege qaviy sağlıq ve bolluq tiledi. Çıqıştan soñ bayramnıñ yaraşığı – qalaqay tığırtuv merasimi oldı. Bu şerefli vazifeni Meclis reisine işandılar. Milliy örneklernen bezetilgen qalaqay oñ tarafınen tüşti, demek 2013 senesi er kes içün bereketli ve hayırlı olacaq.

Bayramnıñ resmiy qısmından soñ istidatlı artistler Seytabla Memetov, Edip Asanov, Rustem Memetov, Afize Kasara, “Hayat” gruppası, QMPU studentleri öz yırlarınen sevindirdiler. Bunıñ kibi de milliy libaslar modası numayış etildi.

Milliy küreş yarışında yeñgen Timur Primşoyev qoçqar aldı.

Bundan soñ sanağa mahsus bayramğa davet etilgen Ukraina halq artisti Femiy Mustafayev, gitaracı Enver İzmaylov ve caz yırcı Camala bayram iştirakçileri ne unutılmaz teessuratlar bağışladılar.