Herson vilâyetinde işğalciler, keçken Kreml esiri Edem Bekirovnıñ evini zapt ettiler

13 Fevral 2023

Herson vilâyetinde rus quvetçileri, keçken kreml esiri Edem Bekirovnıñ ailesiniñ eviniñ qapusını qırıp anda yerleştiler.
Qırımtatar Milliy Meclisiniñ Başı Refat Çubarov bu aqqında yazdı.

– Soñ künlerde rus varvarları tarafından Herson vilâyetiniñ işğal etilgen topraqlarından kelgen malümat kütleviy işkenceler, çalmalar ve Ukraina vaatndaşlarını taqip etüvni köstereler. Rus varvarlarınıñ yapqanları canavarlıqlarnıñ eñ tarqatılğan biri – vatandaşlarnı tevqif etüvler ve «mağazlar»da tutuvlardır. Anda olarnı rus vatandaşlığını ve rus pasportını almaq arzusını bildirmege talap eteler. Red etkenlerni azaplaylar ve öz mülkini (ev, maşna, v.b.) rus işğalcilerine yazıp bermege mecbur eteler. Bundan soñ boysunmağanlarnı işğal zonalarından çıqaralar, – yazdı.

Onıñ sözlerine köre, Geniçesk rayonınıñ Novooleksiyivka qasabasında askerler-aydutlarnıñ keçenlerde tahliye etilmege mecbur qalğan insanlarnıñ evlerini tapıp anda yerleşmeleri içün rus işağlcileri yañıdan reyd keçirdiler.

– Aynı zamanda birinciden Ukraina devletinde ssadıq olğan kişilerniñ evlerinde yerleşeler. Böylece, Novooleksiyivkada rus işğalcileri, Edem ve Gulnara Bekirovnıñ eviniñ qapısını qırıp anda yerleştiler: Edem – sabıq kreml esiri, Gulnara – Qırımtatar Milliy Meclisiniñ azasıdır. Keçenlerde Bekirovler Novooleksiyivkadan tahliye ettiler, – dep Çubarov haber berdi.

Hatırlatamız ki, 2018 senesi ilk qış ayınıñ 12-sinde Qırımğa kirgende rus quvetöileri Edem Bekirovnı tuttılar. TFH, patlayıcı şeyler ve patlayıcı yedeklerni saqlanması ve bermesi içün onı qabaatladı.
2019 senesi berim ayında deñişüv çerçivesinde o azat etildi.