Hayser Cemilevniñ qorçalayıcısı onıñ 60 kün bastırıqta tutuqlanması boyunca Aqmescit şeeri Kiyev rayon mahkemesiniñ qararına qarşı itiraz bildirmek meramında

29.05.2013

“Zanımca, közde tutulğan beş kün içersinde menim tarafımdan itiraz berilecek, çünki bu menim meslegimdir, – dedi Lesovoy. – Zira işni közden keçirirkenim şübeli tarafından qaçıp saqlanmaq areketlerini körmedim. Aksine, o, uquqqoruv organlarınıñ kelmesini bekledi. Tüfekni gizlemek, qaza izlerini silmek boyunca da men iç bir türlü şübeli areket körmedim. Tüfekni uquqqoruv organlarınıñ hadimleri üç saatten soñ aldılar ve tarif ettiler. Qaza yüz bergen yerdeki vaziyetni de deñiştirmedi. Şunıñ içün de onı azatlıqtan mahrum etmek içün yeterli sebep körmeyim. Asılında, bu iş boyunca onıñ ruhiy vaziyetini közden keçirmek içün sebep bar”

Advokatnıñ söylegenine köre qanun evde tutuqlanması, para reini ve şahsen nezaretke aluv kibi çarelerni de közde tuta. “Fikrimce, bütün bu çareler Hayserniñ taqiqat bitken soñ mahkeme qararına qadar beklemesini teminmelerler”, – dey Hayser Cemilevniñ advokatı.

Bundan da ğayrı jurnalistlerniñ “ya ne içün qabaatlayıcı taraf Hayser qaçar, dep saya?” degen sualerine A. Lesovoy dedi ki, böyle muracaat bu, mahkemege muracaat etken insannıñ subyektiv bir fikridir.

Mayıs 28 künü qabaatlayıcı mühkemege bergen malümatında öldürüv mayıs 27 künü saat 15.30-da yapılğan olsa, Hayser Cemilev aynı şu künü saat 18-den bir qaç daqqa keçkende yaqalandı, denile.

“Bir qaç saat devamında o, qaza yüz bergen yerde bulunıp, qaza aqqında haber etip, uquqqoruv organları hadimleriniñ kelmesini beklep oturdı. Nasıl ola da, suçlayıcı tarafnıñ kendisi bergen malümatlarğa köre, qabaatlanıcı qaçmaq çaresinmi körecek. Bu sualge cevapnı uquqçı olaraq men de añlamayım. Belki bu fikirniñ saipleri siziñ sualiñizge cevapnı kendileri bilirler”, – dep izaat berdi Lesovoy.