Hayser Cemilev Mahkeme qararına binaen 2013 senesi iyül 25-ke qadar Aqmescitte hapiste tutulacaq

28 May 2013

2013 senesi mayıs 28-de Aqmescit şeeri Kiyevskiy rayon mahkemesinde Meclis reisiniñ oğlu Hayser Cemilevni qısıtlama üzerinde mahkeme toplaşuvı oldı.

Mahkeme qararına köre Hayser Cemilev 2013 senesi iyül 25-ke qadar (60 kün) Aqmescitte hapiste tutuqlanacaq. Qararnı Kiyevskiy rayon mahkemesiniñ akemi Viktor Mogilânskiy oqup eşittirdi.

Hayser Cemilevni makhemede qorçalaycaq advokat Aleksandr Lessovoy aytqanına köre ağır aqibet ve iş boyunca çoqtan-çoq taqiqat areketleri, ekspertiza yapılması zaruriyetinden kelip çıqaraq şübeliniñ tutuqlanması soruşturmanın bu basqıçında beklenilgen ve aqlı çaredir.

“Bundan da ğayrı Hayser Cemilevniñ babası Mustafa Cemilev adiseniñ ağırlığı ve mürekkepligini, devlet organları ölüm sebeplerini ögrenerek esaslı ve qanuniy qararlar almaq kerekliklerini añlağanı alda, taqiqat ve qabul etilecek qararlarğa tesir etmek kibi areketlerni yapmadı”, – dedi Aleksandr Lessovoy.

“Eger de mahkeme 60 künge azatlıqtan mahrum etmek qararını aldı eken, demek bu qararnı qabul etmek ve endi başlağan taqiqatnıñ neticelerini beklemek kerek”, – dedi advokat Lesovoy qabaatlanıcınıñ babası aytqan sözlerge esaslanaraq.

Şunı da qayd etmeli ki, Avropa mahkemesiniñ belli tecribesi şunı köstere ki taqiqatnıñ başında apiske aluv aqılane ve doğru çaredir, lâkin vaqıt keçtikçe azatlıqtan mahrum etmek içün esas qalmay. A. Lesovoynıñ aytqanına köre mahkeme toplaşuvında seslendirilgen deliller şunı isbatlay ki Hayser Cemilev Fevzi Edemovnı esalet öldürmedi. “Hayser Cemilevniñ kendisi diqqatsızlıqtan ölüm yüz berdi, dep ayta”, – qayd etti Lessovoy.

A. Lesovoynıñ fikrince öldürmek niyeti olmağanını adiseniñ yüz bergen vaqtı da köstere. “Fevzi Edemov gecesi, iç bir kimse olmağan yerde, gizli şekilde degil de, kündüz qararnen saat 15.30-da qasabanıñ merkezinde, qomşu evlerde sakinleri bulunğan bir vaqıtta öldürildi. Demek, H. Cemilev yukarıdaki şartlar altında öldürmeye kararlı olamazdı”. Advokat şuña da diqqatnı çeke ki, Hayser Cemilev facia yüz bergen yerden qaçmağa, areketleriniñ izlerini yoq etmege tırışmadı, militsiya kelgenge qadar bekledi, muqaytsızlığı sebebinden ölüm yüz bergeni aqqında ayttı, adise aqqında babasına haber berip, tez yetip kelmesini rica etti.

Hayser Cemilevniñ qorçalayıcısı üç qurşun tapılğanı aqqında mahkeme ekspertleriniñ hulâsalarına qadar söylemek doğru degil, dedi.

“Mahkeme-tibbiy ekspert adise yüz bergen yerni keregi kibi ögrenip, öz hulâsasında işletip yekün çekmegence biz facia olğan yerde qaç kere qurşun atılğanını bilmemiz”, – dep qayd etti A. Lessovoy ve adise yüz bergen yerde bir gilza tapılğanına diqqatnı celp etti.