Halqara forumnı ötkerüv ğayesi yañı basqıçqa keçti

30 Noyabr 2011

Belli ki, Qırımtatar halqı Meclisiniñ Qırımtatar halqınıñ öz Vatanında aq-uquqlarını ğayrıdan tiklev, Ukrainada onıñ telükesizligini ve inkişafını teminlev boyunca halqara forum keçirüv teşebbüsi Qırımtatar halqı 5-nci çağırılış Qurultayınıñ üçünci sessiyasında (2010 senesi avgust 29)delegatlar tarafından da maqullenip, Ukraina aza oldığı bir çoq halqara ve Avropa teşkilâtlarınıñ, bunıñ kibi de Ukrainada akkreditatsiya yapılğan Avropa Birligi devletleriniñ toluvekâletli temsilcileriniñ de qoltutuvına nail oldı. Bu, Qırımtatar halqı Meclisiniñ reberleri ve bölükleri olacaq Halqara forumnıñ maqsadları ve vazifelerini añlatuv boyunca alıp barğan şekil ceetinden çeşit-türlü ve muntazam işiniñ neticesidir

Bugünde-bugün endi şunı qayd etmek mümkün ki, Qırımtatar halqı Meclisi yolbaşçılarınıñ Birleşken Milletler Teşkilâtı ihtisaslaşqan idarelerniñ reberleri, Avropa Keñeşiniñ vazifedar adamları, bir sıra devletlerniñ Ukrainada akkreditatsiya etilgen Vefqulade ve Toluvekâletli elçilerinen 2010-2011 senesi devamında ötkerilgen çoqtan-çoq körüşüvler öz neticelerini berip başladı ve Halqara forumnı keçirüv ğayesi yañı basamaqqa köterildi. Forumğa ameliy azırlıq başlandı

2011 senesi noyabr 29 künü Qırımtatar halqı Meclisiniñ reisi Mustafa Cemilevniñ adına Kenişletüv ve Avropa eyiqomşucılıq siyaseti meseleleri boyunca Avropa Birliginiñ Komissarı cenap Ştefan Füleden kelgen mektüpte cümleden böyle denile: “Qırımtatar halqınıñ öz Vatanında aq-uquqlarını ğayrıdan tiklev boyunca halqara forum keçirüv teşebbüsini samimiy qarşılağanımız alda, Yalta Avropa strategiyası sammitindeki körüşüvimizniñ neticelerinen memnün olğanımnı bildirem”. Bunıñ kibi de mektüpte “insan aqlarını, şu cümleden azlıqlarnıñ da uquqlarını, ürmet etmek Avropa Birligi faaliyetiniñ baş yönelişi” olğanı ve Avropa Birligi BMT, Avropa Şurası ve ÖBSE ile birlikte çalışmaqnı devam etip, qırımtatar halqı ögündeki meselelerniñ çezilmesine qoltutacağı qayd etile.

Mektübiniñ soñunda Kenişletüv ve Avropa eyiqomşucılıq siyaseti meseleleri boyunca Avropa Birliginiñ Komissarı cenap Ştefan Füle Qırımtatar halqı Meclisiniñ reisi Mustafa Cemilevni Avropa Birligi ileride de bu meseleni Ukraina akimlerinen körüşüvlerinde köterecegini işandırıp, Halqara forumğa azırlıqta muvafaqiyet tiledi.