Halqara Cumhuriyet institutınıñ vekilleri Qurultay delegatlarını saylavda nezaretçi sıfatında iştirak etecekler

03 April 2013

Qırımda Meclis reisiniñ birinci muavini Refat Çubarov Ukrainada Halqara Cumhuriyet institutı programmalarınıñ direktorı Maykl Drakmen ile körüşti.

Onda Qurultay Merkeziy Saylav komissiyasınıñ reisi Zair Smedlâyev, Meclisniñ tış alâqalar bölüginiñ başı Ali Hamzin ve bunıñ kibi de Ukrainada Halqara Cumhuriyet institutı regional programmalarınıñ yolbaşçıları Aleksandr Sputay ve Konstantin Ploskiy bulundılar.

Körüşüvniñ başında Refat Çubarov qırımtatar milliy areketiniñ tarihında toqtalıp, qırımtatarlarnıñ Ekinci qurultayı, Meclis faaliyeti ve olacaq saylavlar aqqında tafsilâtlı ikâye etti ve institut vekillerine milliy qurultay delegatlarını saylavda halqara nezaretçiler sıfatında iştirak etmekni teklif etti.

Maykl Drakmen milliy qurultay delegatlarını saylavda halqara nezaretçi olaraq iştirak etmege razılıq berip, saylav kriteriylerinen meraqlandı.

“Böyle saylavlarda biz evel iç iştirak etmegen edik, amma pek meraqlanamız ve memnünliknen yardımcı olurmız”, – dedi cenap Drakmen.

Meclis vekillerine hıtap eterek o, cümleden şöyle dedi: “eger isteseñiz Kiyevge qaytqan soñ men başqa halqara teşkilâtlarına Qurultay delegatlarını saylavda nezaretçi olaraq iştirak etmekni teklif eterim”.

Buña cevaplanğan Qurultay Merkeziy saylav komissiyasınıñ reisi Zair Smedlâyev musafirlerge beraber çalışmaq istekleri içün teşekkür bildirdi.

Bunıñ kibi de körüşüv devamında Maykl Drakmen Qırımda keçenlerde ötkerilgen fokus gruppalar aqqında haber etip, onda respondent sıfatında qırımtatar gençleri iştirak etkenini ayttı. Ukrainada Halqara Cumhuriyet institutı programmalarınıñ direktorı Maykl Drakmen Meclis vekilleri içün de böyle sorav keçirmekni teklif etti.

Körüşüvniñ soñunda taraflar kelecekte de işbirlikni devam ettirmekni añlaştılar.