Halq oğrunda hızmet etkenlerniñ er biriniñ hatırasını añmağa borclumız

15 December 2012

Dekabr 15 künü Aqmescitte Ukraina akademik muzıkalı teatrde Fazıl Ametov doğğanınıñ 95 yıllığı munasebetinen hatıra kontserti keçirildi.

Tedbirni Fazıl Ametovnıñ qızı Emine Volodarskaya ve torunı Amet Volodarskiy teşebbüsi ile “Zekkiye” inkişaf fondı, “Yañı dünya” gazetası. ATR telekanalı ve “Meydan” radiosı teşkilâtlandırdılar.

Tedbir çerçivesinde Fazıl Ametovnıñ ömüri ve faaliyeti aqqında Qırımda nam qazanğan jurnalist, ATR telekanalınıñ hadimi Sevil Aledinova tarafından azırlanğan vesiqalı film numayış etildi.

Emine Volodarskaya babası aqqında hatırlavlarınen paylaşırken: “Bütün añlı ömürini milliy ğaye ve medeniyet tiklenmesine bağışlağan babam, özüniñ dört evlâdını da vatanperverlik ruhunda terbiyeledi”, – dedi.

Hatıra kontsertinde çıqışta bulunğan Meclis reisi Mustafa Cemilev qayd etti ki, şiddetli sovet rejimine baqmadan qırımtatar halqı milliy areketiniñ iştirakçileri Vatanğa avdet oğrunda faal küreş alıp bardılar.

“Bugün milliy areket iştirakçileriniñ cesürligi sayesinde halqımız Vatanğa qayttı, – dedi Cemilev. – amma teessüf ki, olardan çoqları Qırımğa qaytıp olamadılar”.

Bunıñnen bir sırada Mustafa Cemilevniñ söylegenine köre, milliy arekette yalıñız vatanperverler ve qaramanlar degil de, Vatan içün küreşken arqadaşlarını satqan, organlarğa olarnı yaqalamağa yardım etkenler de olğan. “Bugün ise “intervyü bereler, bizlerge aqıl ögreteler ve milliy idare organlarımıznıñ çalışmasına keder eteler” , – dep qayd etti meclis reisi.

Qırımtatar halqı milliy areketi iştirakçileriniñ arasında öyle bir kimseler bar edi ki, olarnıñ adlarını er kes bilmese de, olar Vatan içün namusnen hızmet ettiler. Qırımtatarlarnıñ bugünki nesili eñ ağır yıllarda halqınen beraber olğan şu insanlarnıñ er biriniñ adını bilmege borcludır.

“Bugün biz qırımtatarlarnıñ toplaşuvlarında ya da informatsiyalarda adı yañğıramağan, amma yüksek devlet vazifelerinde çalışqan onlarnen diger setemdeşlerimiz kibi milliy meseleniñ çezilmesine imkânı olduqça isse qoşqan insan – Fazıl Ametovnıñ hatırasını añmaq içün toplandıq. Halq arasında sayğı qazanğan bu insannıñ adı unutılmamalı”, – dedi Mustafa Cemilev.

Hatıra kontsertini “Qaytarma”, “Qırım” ve ATR telekanalınıñ yır ve oyun ansamblleri, Ukraina İçki işler nazirligi Qırımdaki idaresiniñ arbiy orkestri,
Ukraina halq artisti Femi Mustafayev, Qırımda nam qazanğan artist Dilâver Osmanov, Ukrainada nam qazanğan artist Elzara Batalova, Ukrainada nam qazanğan sanat erbabı Uryane Kenjikayeva, Aliye, Ukrainada nam qazanğan sanat erbabı Riza Yusuf ve digerlerniñ çıqışları yaraştırdılar.