BMTda Meclis reisi: “Tamır halqlarınıñ aqlarını kimse asla bozmamalı”

25.04.2025

Qırımtatar Milliy Meclisiniñ reisi Refat Çubarov Birleşken Milletler Teşkilâtınıñ (BMT) New Yorkta yerleşken baş ofisinde Birleşken Milletler Teşkilâtınıñ Tamır halqları meseleleri daimiy forumınıñ sessiyasınıñ “Birleşken Milletler Teşkilâtınıñ Tamır halqlarınıñ aqları aqqında deklaratsiyası ve 2030 senesine qadar Muntazam inkişafnıñ kün tertibine atıf eterek, Daimiy forumnıñ altı mecburiy saasınıñ muazkeresi (iqtisadiy ve içtimaiy inkişaf, medenieyt, etraftaki müit, sağlıq qoruvı ve insan aqları)” mevzusına bağışlanğan oturışında çıqışta bulundı.

Qırımtatar Milliy Meclisiniñ reisi öz çıqışında şunı bildirdi: “Qırım – tamır qırımtatar halqınıñ toprağı, onıñ vatanıdır, ve aynı zamanda Ukrayina devletiniñ ayırılmaz parçasıdır. Qırımnıñ taqdirini tek Ukrayina devleti ve tamır qırımtatar halqı belgileycek”.

Refat Çubarov moskvanı rusiyeniñ tamır halqlarınıñ vekillerini Ukrayinağa qarşı cenkleşmege mecbur etkeninde qabaatladı.

Çıqışnıñ tolu metnini aşağıda derc etemiz:

Sevgili qardaşlar!

BMTnıñ azası olğan devletlerniñ sayğılı vekilleri!

Memleketler ve olarnıñ halqları arasındaki sıq bağları ve bu sebepten bir-birine bağlılıq, bizni, muntazam inkişaf maqsadlarına irişmek içün, beraber areket etmege mecbur ete.

Añlaşılır ki, milliy seviyede muntazam inkişaf maqsatlarına irişmek içün global ortaqlıqnıñ faalligini arttırmaq kerek.

Bu munasebetnen, bizler muntazam inkişaf maqsadınen global ortaqlıqqa mania olğan siyasiy ve arbiy faktorlarnı muzakere etmekten vazgeçip olamaymız.

Bugün Kıyivde, memleketimniñ paytahtında, çiçek ayınıñ 24-nde gece yüz bergen ve aman-aman 90 insan zarar körgen, olardan 12-si elâk olğan Rusiye raketa ücüminiñ qurbanları içün matem künü ilân etildi. Zarar körgenlerniñ arasında 6 bala ve bir hamile qadın bar edi.

Tecavuz ve zapt cenkleri er vaqıt cinayettir, amma Moskvanıñ Rusiyeniñ tamır halqlarınıñ vekillerini Ukrayinağa qarşı cinayet cenkinde iştirak etmege mecbur etmesi eki qat cinayettir.

Dünyada er bir tamır halqınıñ şanlı, amma sıq-sıq facialı ikâyesi bar. Amma silâlı adamlar kirgende er kes evlerini qorçalamağa tırışa.

Ukrayinler ve qırımtatarlar da öz evlerini, devletini Putinniñ emrinen ukrayin topraqlarına kirgen silâlı aydutlardan qoruylar. Bu munasebetnen Forumnı qırımtatar halqınıñ – Ukrayina tamır halqınıñ, ana toprağı – Qırım – rusiye federatsiyası tarafından 11 yıldır işğal etilgen repressiya ve taqiplerine diqqat ayırmağa çağıram.

İç bir kimse ve iç bir vaqıt tamır halqlarınıñ aqlarını, şu cümleden olarnıñ topraqlarına olğan aqlarını bozmağa izin bermemek kerek.

Şunıñ içün Qırımnen bağlı ayrı tekliflerni köz ögüne alıp, şunı bildirmege izin beriñiz: “Qırım – tamır qırımtatar halqınıñ toprağı, onıñ vatanıdır, ve aynı zamanda, Ukrayina devletiniñ ayırılmaz bir parçasıdır. Qırımnıñ taqdirini tek Ukrayina devleti ve tamır qırımtatar halqı belgileycek”.

Tamır  halqlarınıñ liderlerini, daa da quvetli ve israrlı olmağa çağıram, topraqnı zapt etüv cenkleriniñ toqtatılması ve devamlı inkişaf maqsadlarına irişüv içün.

Diqqatıñız içün sağ oluñız!