Qırımtatar Milliy Meclisiniñ reisi Ukrayinadaki Latviya Elçisinen körüşti

07.11.2025

Boş aynıñ 7-nde Qırımtatar Milliy Meclisiniñ reisi Refat Çubarov, Latviya Cumhuriyetiniñ Ukrainadaki Fevqulâde ve Vekâletli Elçisi Andreys Pildegoviçsniñ davetinen Kıyivdeki Latviya Elçihanesini ziyaret etti.

Belli olğanı kibi, 2025 senesi ilk küz ayınıñ 16-nda Andreys Pildegoviçs resmen Elçi vazifelerini eda etmege başladı.

Refat Çubarov ve Andreys Pildegoviçs qırımtatar halqınıñ vaziyeti ve vaqtınca işğal etilgen Qırımdaki insan aqları vaziyetini muzakere ettiler.

Taraflar şimdiki vaziyetni ve Rusiye-Ukrayina cenkiniñ inkişafınıñ mümkün stsenariylerini muzakere ettiler, Rusiye tecavuzına qarşı halqara toplulıqnıñ daa ziyade birleştirilmesine yardım ete bilecek tekliflernen paylaştılar.

Latviya Cumhuriyetiniñ elçisi bildirdi ki, Latviya 2026 senesiniñ başından başlap, 2026-2027 seneleri müddeti içün BMTnıñ Havfsızlıq Şurasınıñ daimiy olmağan azası vazifelerini eda etmege azırlana.

Qırımtatar Milliy Meclisiniñ reisi Refat Çubarov, Latviya Seymi ŞSCBniñ kommunistik rejimi tarafından 1944 senesi mayısnıñ 18-de qırımtatar halqınıñ sürgünligini genotsid olaraq tanığan ilk Ukrayina Yuqarı Şurasından soñ olğanını qayd etip, Latviya Cumhuriyetine Ukrayinanıñ topraq bütünligi ve suverenitetini ardı-sıra desteklegeni, em de qırımtatar halqınıñ vaziyeti ve Ukrayina devletiniñ terkibinde tuvğan toprağında kelecegine ayırılğan diqqatı içün samimiy minnetdarlığını bildirdi.

Körüşüvniñ soñunda Refat Çubarov elçige, “Küreş” qırımtatar medeniy-sport merkezi” hayriye teşkilâtınıñ azırlap çıqarğanı “Qırım ve qırımtatar halqınıñ tarihındaki müim ve unutılmaz vaqialar taqvimi”ni berdi ve diplomatnı Qırımtatar Milliy Meclisine barıp, onıñ azalarınen körüşmege davet etti.