Futbol boyunca «Meclis kubogı» yarışı başlandı

09 Aprel 2012

Aprel 8 künü Qurman rayonınıñ Kalinino köyünde “Futbol boyunca Meclis kubogı içün” yarışnıñ ekinci oyunı oldı.

Yarışnıñ birinci matçında Qurman rayonınıñ cıyma taqımı ve Aqmescitten kelgen taqım iştirak ettiler. Sevimli oyuncılarına qoltutmaq ve oyunnı seyir etmek içün 100-den ziyade adam keldi.

Yarış aqqında tafsilâtlıca ikâye etmek ricasınen yarışnı keçirüv boyunca işçi gruppanıñ reberi, Qırımtatar halqı Meclisi reisiniñ muavini Remzi İlyasovğa muracaatta bulundıq.

“Birinci nevbette men bizde böyle bir yarış keçirilgeninen memnünim, – dey Remzi İlyasov. – Biz sportnıñ bu çeşitini semetdeşlerimiz arasında kütleviyleştirmek içün yarışnı esalet köylerde keçiremiz. Böyle yarış keçirüvden esas maqsad sağlam ömür tarzını teşviq etmektir”.

Remzi İlyasov bütün taqımlar territorial printsip boyunca bölüngenini qayd ete. Meselâ, yarışnı 6-ncı zona başladı, oña Qurman rayonı, Aqmescit şeeri ve Seytler rayonınıñ taqımları kire.

Oyunnı keçirüv reglamenti tizildi, er bir zona içün mesülietli kişiler tayinlendi. “Teessüf ki Seytler rayonınıñ taqımı kelip olamadı. Sebebini daa bilmeyim, amma tezden belli olur”, – dey Meclis reisiniñ muavini.

“Matçnı büyük memnüniyetlikle seyir ettim. Pek meraqlı oldı. Ümüt etem ki, kelecekte taqımlar tıpqı böyle ğayret ile oynarlar. Futbol – bu taqım olaraq oynalğan oyundır, oyuncılarda o biri-birine qoltutuv, sayğı duyğularını terbiyeley. Bu çizgiler olmasa, bu oyunda iç bir kimse bir şey qazanıp olamaz. Bizim taqımlarda böyle çizgiler bar”, – dey Remzi İlyasov.

Matç, oyunnıñ birinci qısmında mağlübiyetke oğrap, ekinci qısmında ise ğalip olğan Aqmescit taqımınıñ faydasına 3:1 esabınen bitti.

“Meclis kubogı” yarışı finalınıñ çerigine çıqqan taqımlar endi belli. Aqmescit taqımından ğayrı, final çeriginde keçken yarış ğalibi Bağçasaray rayonınıñ taqımı da iştirak etecek. Futbol mühlislerine şunı hatırlatamız ki, İslâm Terek rayonınıñ Zolotoye pole köyünde aprel 15-te olacaq nevbetteki oyunda 7 zona (İslâm Terek, İçki rayonları ve Sudaq şeeri) iştirak etecek.