Frenkistan senatorı Simon Sutür Bağçasarayda

10 Dekabr 2011

Mayıs 10 künü Bağçasaray regional meclisiniñ ofisinde Milliy Meclisniñ birinci muavini Refat Çubarov Frenkistan Senatınıñ senatorı, Frenkistan-Ukraina parlamentara dostluğı gruppasınıñ azası Simon Sutür ile körüşti.

Subetniñ başında S.Sutür Milliy Meclis reisi Mustafa Cemilev ve bütün Meclis azalarına öz deputat gruppasınıñ yolbaşçısı Jan-Pyer Plankadnıñ selâmlarını ayttı ve:

“Plankad cenapları ve 2010 senesi Qırımnı ziyaret etken zenaatdaşlarımız ile o zamandaki körüşüvlerimizni sıq-sıq hatırlaymız. Biz ilk kere qırımtatar halqınıñ meselesi aqqında tafsilâtlıbilgen edik ve bu ziyaretten soñ vatanımızda, parlamentniñ diger azalarına bu meseleniñ çezilmesi müimligini çaremizge köre añlatmağa tırışamız”, – dedi.

Ukrainada vaziyetni muzakere eter ekenler, eki taraf da Ukrainanıñ umumavropa esnaslarında iştiragini faalleştirmek kerek olğanını qayd ettiler, çünki R.Çubarov aytqanı kibi : “Ukrainanıñ Avropa Birligine intergratsiyasına doğrutılğan er bir adım qırımtatarlar tarafından alğışlana.
Belli ki, Ukrainanıñ iqtisadiy inkişafı ukrain cemiyeti demokratiyağa irişmekniñ temelidir ve, elbet de, qırımtatar halqınıñ aq-uquqları tiklenmesine siltemdir”.

Bütündünya kongressiniñ başı musafirge Ukraina ve AB işbirliginiñ munasebetlerini belgileycek esas printsipler nasıl tarzda beyan etilecegine öz noqtayi nazarını aydınlattı.

“Bizim fikirimizce, qırımtatar halqınıñ aq-uquqları tiklenmesi meselesi AB memleketleri, em de Avropa komissiyasınıñ Ukraina ile imzalanğan vesiqalarında, qayd etilse, Ukraina devleti Svetler zamanında qırımtatar halqına qarşı yapılğan genotsidniñ neticelerini yoq etilmesini ve adalet tiklenilmesine doğrutılğan qanuncılıq saasında semereli areketler yapmağa mecbur olur”, – dedi R.Çubarov

Frenkistan senatorına Milliy Meclis azırlağan Qırımtatar halqınıñ öz vatanında aq-uquqları tiklenilmesi, onıñ Ukrainada havsızlığı ve inkişaf etmesine kefalet bermekni teminlemek boyunca Halqara forumğa azırlıq ne derecede olğanı aqqında malümat berdiler.

“Qırımtatr meselesi onıñ zemaneviy añlamında totalitar rejiminiñ mirası olaraq umumavropa meselesi kibi baqılmaq kerek. Çünki çeşit sebeplerge köre, onıñ yalıñız Ukrainanıñ küçü ve imkânları ile çezilmesi ağır olur.

Bizim fikirimizce, qırımtatarlarnıñ sürgünligi ve onyıllarnen aqsımlav neticelerini yoq etüvge halqara teşkilâtlar, şu cümleden AHİT em de AB memleketleri celp etilmesini bu meselege menfaatdar taraflar alğışlamaq kerekler”, – dedi körüşüvde iştirak etken Milliy Meclisniñ Tış alâqaları boyunca bölükniñ başı Ali Hamzin.

A.Hamzin Avroparlament başı Yeji Büzekniñ ve er bir avroparlament azasınıñ adına Halqara forumğa qoltutmaq şahsiy muracaatlar yollanacağı aqqında ayttı.

Senator S.Sutür Meclisniñ ıntılışlarına qoltuttı ve qırımtatar halqını ertaraflama inkişafı kefaletini tek Ukrainanıñ Avropa Birligine qatılması bere bilecegini qayd etti.

Bu körüşüvniñ neticeleri ve ifade etilgen tilekler aqqında mıtlaqqa AHİT Assambleyasınıñ azası olğan J.-P. Plankadğa yazma şekilde esabat berecegini ayttı. Çünki iyün ayında Budapeştte olacaq AHİTnıñ mahsus konferentsiyasında J.-P. Plankad öz maruzasında qırımtatar halqınıñ Ukrainadaki vaziyeti aqqında aytmağa niyetlene eken.