Frantsiya elçisinen körüşüv

11 Yanvar 2011

2011 senesi iyün 11 künü Qırımtatar halqı Meclisiniñ reisi Mustafa Cemilev Frantsiyanıñ Ukrainadaki Vefqulade ve Tolu vekâletli elçisi Jak For ile körüşti. Elçi bu künlerde Qırımda hususiy ziyaret ile bulunmaqta.

Körüşüvde Bütündünya qırımtatarlar kongressiniñ prezidenti, Milliy Meclis reisiniñ birinci muavini Refat Çubarov, Meclis tışqı alâqalar bölüginiñ başı Ali Hamzin ve Bağçasaray rayon devlet memuriyetiniñ reisi İlmiy Ümerov iştirak ettiler.

Körüşüv iştirakçileri qırımtatar halqınıñ bugünki vaziyetine dair meselelerni, onıñ yerleşüvi ve Ukraina em de Qırım Muhtar Cumhuriyeti akimiyet organları ve idareleri ile dialog şekilleriniñ hususiyetlerini muzakere ettiler.

Qırımtatar halqı Meclisiniñ reisi Mustafa Cemilev cenap Jak Fornı Qırımnıñ tarihiy paytahtı Bağçasarayda yaqın vaqıtta olacaq “La Richesse” Qırımtatar müzeyi merkeziniñ tantanalı açılışına davet etti. Mustafa Cemilev açılacaq müzeyniñ bir buçuq biñge yaqın eksponatlarını Frantsiyada yaşağan qırımtatarı Gülliver Altın toplağanını qayd etti.

Frantsiyanıñ Ukrainadaki Vefqulade ve Tolu vekâletli elçisi Jak For subetdeşleriniñ Qırım ve Frantsiya arasındaki medeniy bağlarnı Frantsiya ve Ukraina cemaat teşkilâtlarınıñ faaliyetlerini aktivleştirüv yolunen kenişletmek lâzimligi aqqındaki fikirlerine tolusınen qoltuttı.

Bunıñ kibi de körüşüv iştirakçileri qırımtatarlarnıñ öz vatanında aq-uquqlarını ğayrıdan tiklev meselesi boyunca Halqara forumnı azırlav ve keçirüvnen bağlı meselelerni de muzakere ettiler.