Fikret Halil hatıramızda temeli qaviy, iradeli, adaletperver insan olıp qalacaq

12 Aprel 2012

Qırımda aman-aman 45 yıl yaşağan, bu devirniñ ekseriy vaqtını İçki rayonı Razdolnoye qasabasında qorantasınen çoq adaletsizliklerge rastkelgen mürekkep, amma ğayet nümüneli ömür keçirgen milliy areketimizniñ erbabı, ateşin vatanperver, acayıp insan Fikret Seydamet oğlu Halil 72 yaşqa biraz yetmey, bu dünyanı terk etti.

O, 1967 senesi 5-sentâbrdeki sahte ve aşalayıcı sovet fermanı çıqqanından bir afta soñ, birinciler sırasında Qırımğa kelip çıqqan edi ve, soñu olmağan taqiplerge baqmadan, Vatandan keri qaytmadı, onda ebediy qaldı.

Bundan bir qaç yıl evel Taşkent vilâyeti Toy-Tepe qasabasında, istisalda çalışqan Fikret Halil teşebbüsçilerge qoşula. Bekabad, Yangi-Yül, Angren, Çırçıqtaki safdaşlarınen bağ tuta, andaki yetekçilerniñ vazifelerini becere.

1965-67 seneleri halq vekilleri sırasında defalarca Moskvağa bara. Akimiyet vekillerinen bir sırada o zamannıñ itibarlı ziyalılarınen körüşe, olarğa halqımıznıñ vaziyetini añlata. Öyle subetdeşlerinden biri “öttepel” bayrağı – “Novıy mir” mecmuanıñ baş muarriri, meşur “Po pravu pamâti” destanınıñ müellifi A. Tvardovskiy de ola.

Fikret Seydamet oğlu 1940 senesi 4-mayısta Qırımnıñ eñ büyük köylerinden biri, Uskutte (Aluşta rayonı) dünyağa kele. Sürgünlikte qorantası Samarqand vilâyeti Bulunğur rayonına tüşe. Birazdan ana-babası ömür tarzı fenalaşqanı sebebinden ve bir çoq köydeşlerinen birleşmek niyetinen Taşkent vilâyetine köçmek qararına keleler.

Fikret anda büyükleşe, mektep bitire, çalışmağa ve milliy arekette iştirak etmege başlay. O zaman çeşit regionlarda yaşağan körümli cemaat erbaplarımıznen körüşe, qonuşa, milliy davanen bağlı çoq şeyge olardan ögrene, avalelerini yerine ketire.

Taqiplerge oğramaqnıñ neticeleriniñ birinde oña qarşı “cinaiy iş” açıla ve Ahangaran şeer mahkemesi üç yıl müddet şartlı sürette ceza bere. Peşine çoqtan tüşken KGB onı “terbiyelemege” tırışa.

1967 senesi 12-sentâbrde Qırımğa kelip, vatandaşlarını qarşılap alğan ve olarğa ilk yardım köstermek boyunca işçi gruppanıñ azası ola. O gruppa demiröl vokzalında, ava limanında nevbetçilerni tayinlemek, malümat toplamaq, cedvelge aluv (propiska) meselesini çezmek, cenkten evel Qırımda yaşağan diger millet vekillerinen bağ tutmaq kibi işlerni becere edi.

Bir çare etip, Qırımda qalmağa nail olğan Fikret Halil şu devirden başlap, Qırımğa vaziyetni ögrenmek ve başqa maqsatlarnen kelgen milliy erbaplarımıznı qarşılay, yerleştire, olarğa malümat-esabat bere, olarnen mesleatlaşa, işlerni belgiley. Özü de Özbekistanğa defalarca barıp, milliy yetekçilerge, cemaatımızğa qıymetli malümat yetkize.

Böyle faalikni begenmegen organlar onı qorquzacaq, Qırımnı terk ettirecek olalar, amma neticege irişmeyler.

Fikret Halil 1991 senesi Ekinci Milliy Qurultay ötkerilmesine onıñ Teşkiliy komitetiniñ azası olaraq öz salmaqlı issesini qoştı, onda saylanğan ilk Milliy Meclisniñ terkibine kirdi. Soñra Üçünci Milliy Qurultaynıñ delegatı, Qırım musulman Qurultayı Teftiş komissiyasınıñ azası saylanıldı, diger cemaat işlerinde faal iştirak etti.

O, milliy arekette daima birlik-beraberlik üküm sürmesi, içki dava-añlaşmasızlıqnı yoq etmekniñ itiqatlı tarafdarı edi.

Fikret Halil merametli, yımşaq göñülli, mulâyim, bunıñnen beraber temeli qaviy, iradeli, adaletperver insan edi ve öyle de bizim hatıramızda qalacaq.
Safdaşımız vefat etkeni munasebetinen onıñ qorantasına teren taziyemizni bildiremiz ve baş sağlığı tileymiz.

Elvida, qıymetli dostumız!
Allah rahmet eylesin.

Milliy Meclis azaları.