Fevral 21 – Ana Tili Künü

21 February 2013

2000 seneden başlap dünyada “Halqara ana tili künü” qayd etile.

Bugün İ.Gasprinskiy adına milliy kitaphanede bu künge bağışlanğan  “Qırımtatar tilini saqlap qaluvda kedaylarnıñ emiyeti”  mevzuda  tedbir keçirildi.

Tedbir Milliy Meclis qabul etken “Ana tili oğrunda küreş” programması çerçivesinde “Maarifçi” birleşmesi, Qırımtatar yazıcıları birligi ve İ.Gasprinskiy adına  qırımtatar kitaphanesiniñ  işbirliginde  teşkil etildi.

Yedi  yıl devamında  fevralniñ 21 künü, iş bu  icadiy  işbirligi  saasında İ.Gasprinskiy adına milliy kitaphanede, qırımtatar tiliniñ saqlanuvı, propagandirlevi ve inkişafına hızmet etken yazıcı, oca, sanatçı, jurnalist, medeniyet erbapları toplaşalar.  Qırım Yuqarı Şurasınıñ deputatı, Milliy Meclis medeniyet ve tasil  idaresiniñ  reberi, “Maarifçi” birleşmesiniñ reisi Safure Kacametova   ananege  çevirilgen  tedbirni açar eken,   Qırım  kedayları facialı tarihımız içersinde halq ağız yaratıcılığı vastasınen ana tilimizni saqlap, onıñ sıñırsız zenginligini genç nesilge yetkizdiler,  dedi. Onıñ aytqanına köre,  “Ana tili künü”ne  bağışlap keçirilgen  tedbirniñ  mevzusı er sene  teşkilâtçılar   tarafından deñiştirile. Qırım medeniyet nazirligi adından kitaphane- matbuat resurs sektorınıñ müdiri Pavel İbadlayev sözge  çıqtı ve  medeniyet naziri A. Plakidanıñ selâmını yetkizdi.

“Qırım kedayları” mevzusında  Qırımtatar yazıcılar birliginiñ azaları Zakir Kurtnezir, Ayşe Kökiyeva, Üriye Edemovanıñ  meraqlı  çıqışları  er kesniñ  alğışını qazandı.

Şair Riza Fazıl ve jurnalist Siyare Mecitovanıñ çıñlaşqanları bu sözlerni isbatladı.

Çıñlarnen beraber tedbirde  Qırımda nam qazanğan artistler Rustem Memetov ve  Resul Halil tarafından saz ve aşq yırları icra etildi. İ.Gasprinskiy adına milliy kitaphaneniñ hadimleri “Qırımtatar yazıcılar birliginiñ” reisi Riza Fazıl  tedbirler “Ana tili oğrunda küreş” programması çerçivesinde azırlanğanını qayd ettiler. Riza Fazıl programmada tilimizni saqlav ve inkişafına yapılacaq maddeler bar, olarnı becermek epimizge bağlı, amma yerli meclislerniñ üstüne bu çalışmalarnı mutlaqa becermek vazifesi  mıtlaqa qoyulmalı dedi. İ.Gasprinskiy adına milliy kitaphaneniñ müdiri Gülnara Yağyayeva böyle tedbirler oquyıcılarımızğa  ana tilimiznen bağlı zengin bilgi bere, dedi.  Sürgünlikni başından keçirgen, Özbekistanda doğulıp Qırımğa qaytqan ve mında doğulğan nesilni birleştirgen tedbirde  TMU  qırımtatar tili ve edebiyatı bölüginiñ studentleri Üsein Cabbarov, Leviza Seitbelâlova, Ürhiye Nematullayeva şiir ve aytımlarnen merasimni yaraştırdılar. Milliy areket veteranı Şefiqa Konsul Özbekistanda ana tilimiz saasında yapılğan areketlerni tarif etti.  

Ğayet sıcaq müitte keçken tedbirde Türkiyeniñ Köniya şeerinden kelgen, tamırı qarasubazardan olğan Vaap Burunduq,  rahmetli  qartbabasınıñ hatırlavlarınen  paylaşıp,  tedbirde añılğan kedaylarnıñ  ve  ana tilimizniñ saqlanmasına hızmet etken keçmişlerimizniñ ruhlarına  dua oqudı .

Tedbirni Qırımtatar İ.Gasprinskiy adına kitaphaneniñ müdir muavini Leylâ Kadırova alıp bar