Fevral 19 künü Noman Çelebicihannıñ hatırasına edebiyat yarışınıñ neticelerine yekün çekildi

19 Fevral 2014

Qırım Halq cumhuriyetiniñ birinci reisi, qırımtatar halqı 1-nci qurultayınıñ teşkilâtçısı, Qırım musulmanlarınıñ müftiyi Noman Çelebicihan öldürilmesiniñ 96 yıllığı munasebetinen planlaştırılğan tedbirler çerçivesinde ötkerilgen edebiyat yarışınıñ neticelerine fevral 19 künü yekün çekildi.

Yarış Meclisniñ Qırımtatar tilinde tasil ve qırımtatar tilini Qırımnıñ devlet ve içtimaiy ömürge tadbiq etüv meseleleri idaresi ve Qırım musulmanları diniy idaresiniñ qoltutuvında ötkerildi.

Jüri eyyetine Milliy Meclisten Ayder Acimambetov, Qırım musulmanları diniy idaresinden Ayder İsmailov, Ukrainada nam qazanğan artist Riza Yusuf, “Emel” teşkilâtından Müslim Dervişev ve QMPUdan Fera Seferova kirdiler.

Yarış ğaliplerini taqdirlev merasiminde Meclis reisi Refat Çubarov, QMPU rektorı Fevzi Yaqubov, belli qırımtatar şairi Şeryan Ali, “Qırım” hayriye fondınıñ baş müdiri Riza Şevqiyev, “ATR” televizion kanalı informatsion programmalar reberi Şevket Memetov, “Fond Til ve Tasil” cemaat teşkilâtınıñ başı Enise Abibullayeva, cemaatçılıq vekilleri iştirak ettiler.

Meclis reisi yarışnıñ keçirilmesi ve ğaliplerni taqdirlenmesine qoltutqan Qırım musulmanlarınıñ diniy idaresi, “Qırım” fondı” hayriye teşkilâtı, “Alraid” birleşmesi, ATR telekanalı, “İnkişaf” cemaat teşkilâtı ve QMPUğa teşekkür bildirdi.

“İfadeli oquv” ve “Taqdim” nominatsiyalarından ibaret yarışta 30 nefer 5-11-nci sınıf talebeleri, bunıñ kibi de QMPUnıñ studentleri iştirak ettiler, – dedi Meclis idaresiniñ başı Emine Avamileva. – Yarışnıñ eki qısmı da Noman Çelebicihannıñ icadiy, siyasiy- içtimaiy ve diniy faaliyetine bağışlandı. “İfadeli oquv” nominatsiyasında Noman Çelebicihannıñ eñ belli “Bastırıq”, “Sarı tülpan”, “Aygidi, qırımtatar yaşları”, “Ant etkenmen” kibi şiirleri yañğıradı. Fon avası zil tutuvında yañğırağan şiirler Noman Çelebicihannı belli siyasiy, cemaat ve din erbabı olaraq numayış ettiler”.

“İfadeli oquv” nominatsiyasında birinci yerni Canköy rayonı Qalay milliy mektebi 9-ncı sınıf talebesi Ramazan Zakirov, ekinci yerni Qamacı köyündeki milliy mektepniñ 8-nci sınıf talebesi Şerife Ğafarova ekinci ve kene şu mektepniñ 5-nci sınıf talebesi Riana Ümerov üçünci yerni qazandılar.

“Taqdim” qısmında birinci yerni Aqmescitteki 7-nci mektepniñ 10-ncı sınıf talebesi Sevil İsmailova, ekinci yerni Aqmescitteki 23-nci mektepniñ 10-ncı sınıf talebesi Nayle Bekirova, üçünci yerni Eski Qırımdaki 2-nci milliy mektepniñ 10-ncı sınıf talebesi Alime Asanova qazandı.

Birinci yerni qazanğanlar Qırım musulmanları diniy idaresi ve “Alraid” birleşmesinden planşetler, ekinci yerni qazanğanlar “Qırım fondı” hayriye teşkilâtından smartfonlar ve üçünci yerni qazanğanlar ATR telekanalından Valeriy Vozgrinniñ dört cıltlı tarih kitabınen taqdirlendiler.

Edebiyat yarışınıñ epsi iştirakçileri ATR telekanalından hatıra suvenirleri berildi. Studentler arasında çıqqan Diana Alimova, Elvina Saidahmetova, Zeliha Ümerovağa para mukâfatlarını “İnkişaf” teşkilâtınıñ vekilleri Seytasan Asanov ve Dilâver Seithalilov berdiler.

Er bir qırımtatarı içün eñ qıymetli bahşış – milliy bayraqnı yarış ğalipleri Meclis reisi Refat Çubarovdan aldılar.

Meclis reisi R. Çubarovnıñ sözlerine köre öz halqınıñ aqları içün canını feda etken cesür küreşçi Noman Çelebicihannıñ hatırasına bağışlanğan edebiyat yarışı ösip keleyatqan nesilge öz Vatanına sevgi, Qırım içün mesüliet ve milliy degerliklerinen ğurur duyğularını aşlar.

“Eminim ki, böyle zekâlı tedbirler gençler arasında vatanperverlik, tarihiy hatıra ve medeniyetni inkişaf ettirüvde öz vazifesini eda eter, – dedi Meclis reisi Refat Çubarov, ve kelecekte yarış Qırımnıñ cemi oquv yurtlarını qavrap alacağına ümüt bildirdi